“میں جذباتی اس لیے ہوئی کیونکہ ان کی گہری باتوں نے مجھے عابد علی کی یاد دلا دی۔ وہ آج بھی میرے ساتھ ہیں۔ ہاں، میں خود کو مصروف رکھتی ہوں، لیکن وہ میرے لیے سایہ تھے، میری حفاظت تھے، میری زندگی تھے، اور کوئی بھی اپنی زندگی کے سہارے کے بغیر نہیں رہ پاتا۔ معذرت، میں ناظرین کے سامنے رونا نہیں چاہتی تھی۔”
“ہماری پہلی ملاقات ایک فلائٹ میں ہوئی جب میں کیبن کرو میں تھی۔ وہ عام سا لمحہ تھا، میرے لیے بس ایک فین موومنٹ۔ بعد میں کوئٹہ میں دوبارہ ملاقات ہوئی جب میں ان کے ساتھ ایک ڈرامے کی شوٹنگ کر رہی تھی۔ پھر دیکھتے ہی دیکھتے 2006 میں ہماری شادی ہوگئی۔”
رابعہ نورین نے حالیہ پروگرام میں عابد علی کے ساتھ اپنے تعلق، محبت اور جدائی پر پہلی بار کھل کر بات کی تو وہ کئی بار نم آواز اور بھیگی آنکھوں کے ساتھ نظر آئیں۔ انہوں نے بتایا کہ عابد علی نہ صرف ایک بڑے فنکار تھے بلکہ اپنی ذات میں ایک مضبوط سہارا بھی تھے جن کی موجودگی ان کے لیے حفاظت، محبت اور اعتماد کا نام تھی۔ رابعہ نورین کے مطابق ان کی زندگی میں تبدیلی اس وقت شروع ہوئی جب ایک عام ملاقات آہستہ آہستہ خاموش اور بے لفظ جذبے میں بدلنے لگی، اور پھر یہی تعلق شادی تک پہنچ گیا۔
“ہم دونوں نے کبھی ایک دوسرے کو پھنسانے کی کوشش نہیں کی۔ سب کچھ خود بخود ہوا۔ میں بہت خاموش طبیعت کی تھی، اور ان کے بارے میں سنا تھا کہ وہ سخت ہیں، اس لیے میں ان سے ڈرتی بھی تھی۔ مگر میں سیٹ پر ان کے رویے کو دیکھ رہی تھی۔ وہ ہر شخص کی خبر رکھتے، سب کے کھانے، آرام کا خیال رکھتے۔ ایک بار 4 بجے صبح شوٹنگ ختم ہوئی تو وہ پوری ٹیم کو فوڈ اسٹریٹ لے گئے۔”
“مجھے ان سے محبت ہونے کا احساس اس دن ہوا جب چھ مہینے روزانہ ایک دوسرے کو ‘گڈ مارننگ’ بھیجنے کے بعد ایک دن ان کا پیغام نہیں آیا۔ میں نے ان سے کھل کر بات کی کہ میں کسی مشکل میں نہیں پڑنا چاہتی کیونکہ وہ شادی شدہ تھے۔ میں نے کہا ہمیں یہ سب ختم کر دینا چاہیے۔ مگر انہوں نے منع کردیا اور کہا کہ حالات پر زیادہ سوچنے کے بجائے سب کچھ فطری انداز میں ہونے دیں۔”
انہوں نے کہا کہ عابد علی کا سلوک نہ صرف ان کے ساتھ بلکہ پوری ٹیم کے ساتھ بےحد شفقت بھرا ہوتا تھا۔ شوٹنگ کے مشکل اوقات میں وہ ہر فرد کا خیال رکھتے، سب کی ضروریات کا دھیان کرتے اور یہی باتیں رابعہ نورین کے دل میں جگہ بناتی گئیں۔ محبت کا اظہار بھی دونوں کے درمیان دھیمی رفتار سے، بغیر کسی منصوبہ بندی کے، خود بخود ہوا۔
سوشل میڈیا پر ان کی گفتگو تیزی سے وائرل ہوئی، اور مداحوں نے بھی اس تعلق کی سچائی اور خوبصورتی کو خراجِ تحسین پیش کیا۔ رابعہ نورین کا کہنا ہے کہ عابد علی کی یاد آج بھی ان کے ساتھ ہے اور وہ ان کے چھوڑے ہوئے خالی پن کو اب بھی محسوس کرتی ہیں، لیکن وہ اپنی زندگی کو ان ہی کی محبت اور نصیحتوں کے سہارے آگے بڑھا رہی ہیں۔