کراچی کی دہشت اور خوف پھیلانے والی لینڈ مافیا نے پاکستان کے اولمپکس باکسنگ میں کانسی کا تمغہ جیتنے والے حسین شاہ کو بھی نہیں بخشا۔
حسین شاہ جو جاپان میں مقیم ہیں، نے اپنی ایک ویڈیو میں بتایا کہ کس طرح سے ان کے ایک رہائشی پلاٹ پر لینڈ مفیا نے قبضہ کرلیا ہے۔ حسین شاہ نے وزیراعظم شہباز شریف اور وزیراعلیٰ سندھ سید مراد علی شاہ سے اپیل کی ہے کہ یا تو ان کے پلاٹ کو لینڈ مافیا کی گرفت سے واپس دلایا جائے یا پھر ان کو دوسرا پلاٹ دیا جائے۔
حسین شاہ کو 1988 سول اولمپکس میں کانسی کا تمغہ جیتنے پر حکومتِ سندھ نے 25 ہزار روپے اور ایک رہائشی 120 گز کا پلاٹ جو گلستان جوہر میں ہے، انعام کے طور پر دیا تھا۔
حسین شاہ کا کہنا ہے کہ وہ اپنے باکسنگ کیریئر کے لیے کچھ سال بعد جاپان چلے گئے تھے اور لاکھ کوششوں کے باوجود وہ اپنا پلاٹ نہیں بچا پائے۔ ان کا کہنا ہے کہ وہ پاکستان واپس آکر رہائش پذیر ہونا چاہتے ہیں اور اس لیے وہ کراچی میں اپنا گھر بنانا چاہتے ہیں جس کے لیے ان کو پلاٹ کی ضرورت ہے۔