وفاقی وزیر خزانہ محمد اورنگزیب نے کہا ہے کہ پاکستان کی معیشت استحکام کی طرف بڑھ رہی ہے اور مجموعی مالی صورتحال مثبت اشارے دے رہی ہے۔ وزیر خزانہ کے مطابق حکومت نے آئی ایم ایف کے ساتھ اسٹاف لیول معاہدہ کامیابی سے طے کر لیا ہے، جو ملکی معیشت کے لیے ایک اہم پیش رفت ہے۔ اس معاہدے کے بعد رواں مالی سال میں مالیاتی ڈسپلن، سرمایہ کاروں کے اعتماد اور معاشی بحالی کے امکانات مزید مضبوط ہوں گے۔
انہوں نے کہا کہ آئی ٹی سیکٹر اس وقت پاکستان کی بہترین کارکردگی دکھانے والی صنعت بن چکا ہے، جس کی ترقی ملکی آمدنی میں اضافے کا بنیادی ذریعہ بنتی جا رہی ہے۔ وزیر خزانہ کے مطابق آئی ٹی کی برآمدات میں نمایاں تیزی دیکھنے میں آئی ہے، جبکہ مجموعی طور پر ملکی ایکسپورٹس میں 5 فیصد اضافہ ریکارڈ کیا گیا ہے، جو کہ تجارتی سرگرمیوں کی بحالی کا واضح ثبوت ہے۔
محمد اورنگزیب نے اس عزم کا اظہار بھی کیا کہ حکومت معیشت کی پائیدار گروتھ برقرار رکھنے کے لیے پرعزم ہے۔ انہوں نے کہا کہ معاشی اصلاحات، محصولات کے نظام میں بہتری اور برآمدات کے فروغ کے لیے ٹھوس اقدامات جاری ہیں، تاکہ ترقی کا تسلسل برقرار رکھا جا سکے۔
وزیر خزانہ نے مزید کہا کہ حکومت کا فوکس مالی نظم و ضبط، کاروبار میں آسانیاں پیدا کرنے اور عالمی سرمایہ کاروں کے اعتماد کو بحال کرنے پر ہے۔انہوں نے امید ظاہر کی کہ آئی ایم ایف معاہدے کے بعد پاکستان کی معاشی رفتار مزید مستحکم ہوگی۔