عالمی بینک نے پاکستان کے لیے 700 ملین ڈالر کی فنانسنگ کی منظوری دے دی ہے، جو پاکستان پبلک ریسورسز فار انکلوژو ڈیولپمنٹ پروگرام کے تحت فراہم کی جائے گی۔ اس منصوبے کا مقصد میکرو اکنامک استحکام، ٹیکس نظام میں بہتری اور عوامی خدمات کے معیار کو بہتر بنانا ہے۔
عالمی بینک کے مطابق اس پروگرام کے تحت مجموعی طور پر 1.35 ارب ڈالر تک فنانسنگ فراہم کی جائے گی، جس میں 600 ملین ڈالر وفاقی حکومت اور 100 ملین ڈالر سندھ حکومت کے لیے مختص ہیں۔ فنڈز کی فراہمی اصلاحاتی اہداف کے حصول سے مشروط ہوگی۔
بینک کا کہنا ہے کہ پروگرام میں شفاف مالی نظم و نسق، ڈیجیٹل ڈیٹا اور مالیاتی نظام کی بہتری پر توجہ دی جائے گی تاکہ سروس ڈیلیوری مؤثر بنائی جا سکے۔ یہ پروگرام آئی ایم ایف کی ایکسٹینڈڈ فنڈ فیسلٹی سے ہم آہنگ ہے۔
عالمی بینک کے مطابق اصلاحات کے نتیجے میں سندھ میں صحت اور تعلیم کے شعبوں کے لیے وسائل میں اضافہ متوقع ہے، جبکہ شفافیت بڑھنے سے عوامی اعتماد میں بھی بہتری آئے گی۔