اسلام آباد میں پولیس نے انٹیلی جنس ایجنسیوں کی مدد سے امریکی سفارت خانے کا جعلی کارڈ استعمال کرنے والے افغان شہری کو گرفتار کر لیا ہے۔ ذرائع کے مطابق ملزم کی شناخت حارث کے نام سے ہوئی ہے۔
ذرائع کا کہنا ہے کہ گرفتار شخص دو خواتین کے ہمراہ گاڑی میں ڈپلومیٹک انکلیو میں داخل ہوا تھا۔ پولیس اور انٹیلی جنس ادارے پہلے ہی ملزم کی نشاندہی کر چکے تھے اور اس کی مشکوک سرگرمیوں پر مسلسل نظر رکھی جا رہی تھی۔
بروقت کارروائی کرتے ہوئے سیکیورٹی اہلکاروں نے ملزم کو حراست میں لے لیا جبکہ اس کے قبضے سے امریکی سفارت خانے کا جعلی کارڈ بھی برآمد کر لیا گیا ہے۔
ذرائع کے مطابق واقعے کی مزید تفتیش جاری ہے اور سکیورٹی ادارے اس بات کا جائزہ لے رہے ہیں کہ ملزم کا تعلق کسی منظم نیٹ ورک سے ہے یا نہیں جبکہ جعلی کارڈ کے ذریعے ڈپلومیٹک انکلیو میں داخلے کے مقصد کا بھی تعین کیا جا رہا ہے۔