ایڈیشنل آئی جی کراچی جاوید عالم اوڈھو نے چالان سے بچنے کے لیے جعلی نمبر پلیٹس لگانے والوں کے خلاف جمعہ سے بڑے پیمانے پر مہم شروع کرنے کا عندیہ دے دیا۔
جاوید عالم اوڈھو نے پریس کانفرنس کے دوران بتایا کہ کراچی میں ٹریکس کا سسٹم اکتوبر سے شروع کیا، جس سے ٹریفک میں واضح بہتری نظر آئی ہے، ٹریفک بہتری میں صرف پولیس کا کردار نہیں بلکہ عوام بھی اپنا کردار ادا کر رہی ہے اور ہیلمٹ کا استعمال اور ٹریفک رولز کی پاسداری کر رہی ہے۔
انھوں نے کہا کہ کچھ لوگوں نے ٹریفک کی خلاف ورزی کرنے اور چالان سے بچنے کے لیے نئے حربے استعمال کرنا شروع کیے ہیں، جعلی نمبر پلیٹس کے استعمال میں اضافہ ہوا ہے۔
ان کا کہنا تھا کہ جمعہ سے جعلی نمبر پلیٹوں کے خلاف بڑے پیمانے پر مہم شروع کرنے جارہے ہیں، ہم کسی کے ساتھ زیادتی نہیں کریں گے، نمبر پلیٹس کے استعمال کی نگرانی محکمہ ایکسائز کر رہا ہے۔