بھارتی معروف اداکارہ عالیہ بھٹ نے حال ہی میں اپنی شادی کے لباس سے متعلق دلچسپ انکشافات کیے ہیں۔ عالیہ بھٹ اور اداکار رنبیر کپور کی شادی 14 اپریل 2022 کو ممبئی میں ان کی رہائش گاہ میں نہایت سادگی کے ساتھ انجام پائی تھی۔
اس خصوصی موقع پر عالیہ بھٹ نے مشہور فیشن ڈیزائنر سبیاساچی مکھرجی کی تیار کردہ سفید اور سنہری رنگ کی آرگنزا ساڑھی زیب تن کی جسے ڈیزائنر کی جانب سے ’چائے ڈِپ سفید‘ کا نام دیا گیا تھا۔
اداکارہ نے بتایا کہ انہوں نے روایتی سرخ عروسی لباس کے بجائے ہلکے رنگ کی ساڑھی پہننے کا فیصلہ اس لیے کیا کیونکہ وہ اپنی شادی کے دن خود کو زیادہ آرام دہ اور پُراعتماد محسوس کرنا چاہتی تھیں۔
فیشن میگزین ووگ سے گفتگو کے دوران عالیہ بھٹ کا کہنا تھا کہ وہ خود کو ساڑھی میں سب سے زیادہ پُرسکون محسوس کرتی ہیں۔ انہوں نے سبیاساچی کے ساتھ ابتدائی ملاقات میں ہی واضح کر دیا تھا کہ وہ اپنی شادی پر ساڑھی ہی پہنیں گی اور ان کے لیے سکون سب سے اہم چیز ہے۔
عالیہ کے مطابق جب رنگ کے انتخاب پر بات ہوئی تو انہوں نے سفید اور سنہری رنگ کی خواہش ظاہر کی جس پر سبیاساچی نے آرگنزا ساڑھی کا مشورہ دیا جو سادگی کے باوجود شاہانہ انداز کی عکاس تھی۔
اداکارہ نے یہ بھی انکشاف کیا کہ ان کی ساڑھی میں ایک خاص ٹرین شامل کی گئی تھی جس پر ان کی شادی کی تاریخ کے ساتھ ایک نہایت ذاتی اور خفیہ جملہ ’مسز ہپسٹر‘ لکھا گیا تھا جس کا مطلب صرف عالیہ اور رنبیر ہی جانتے ہیں۔
زیورات کے حوالے سے عالیہ بھٹ نے بتایا کہ انہوں نے سبیاساچی کے تیار کردہ بغیر تراشے ہیرے کا سیٹ زیب تن کیا تھا جس میں بڑا ہار، بڑے جھمکے اور مانگ ٹیکا شامل تھا۔