بنگلادیش کی عبوری حکومت نے تصدیق کی ہے کہ مفرور سابق وزیراعظم شیخ حسینہ واجد کی سیاسی جماعت عوامی لیگ کے آئندہ سال فروری میں ہونے والے عام انتخابات میں حصہ لینے پر پابندی لگا دی گئی ہے۔
کشمیر میڈیا سروس کے مطابق بنگلادیش کی عبوری حکومت کے چیف ایڈوائزر کے پریس سیکریٹری شفیق الاسلام نے ڈھاکا میں پریس کانفرنس میں میڈیا کو بتایا کہ عوامی لیگ پر انسداد دہشت گردی قانون کے تحت پابندی لگائی گئی ہے، اس کی سیاسی سرگرمیاں اس وقت ملک میں ممنوع ہیں اور الیکشن کمیشن نے پارٹی کی رجسٹریشن بھی منسوخ کردی ہے۔
شیخ حسینہ واجد اور عوامی لیگ کے رہنما بین الاقوامی جرائم ٹربیونل میں مقدمے کا سامنا کر رہے ہیں۔ مئی میں عبوری حکومت نے بنگلادیش عوامی لیگ اور اس کی اتحادی تنظیموں کی سرگرمیوں پر پابندی لگانے کے لیے ایک گزٹ نوٹیفکیشن جاری کیا تھا۔ بنگلادیش کی سابق وزیراعظم شیخ حسینہ واجد گزشتہ سال عوامی احتجاج کے نتیجے میں اقتدار چھوڑ کر بھارت فرار ہوگئی تھیں۔
عبوری حکومت کی مشاورتی کونسل کے اجلاس کے بعد شفیق الاسلام نے کہا کہ عوامی لیگ کی سرگرمیاں مقدمے کی سماعت مکمل ہونے تک معطل رہیں گی۔