بھارت نے دوبارہ جنگ مسلط کی تو پاکستان بھرپور جواب دینے کے لیے تیار ہے، صدر زرداری

صدرِ مملکت آصف علی زرداری نے کہا ہے کہ بھارت کے مزید جنگی جہاز گرائے جا سکتے تھے، تاہم پاکستان نے تحمل کا مظاہرہ کیا۔ انہوں نے واضح کیا کہ اگر دوبارہ جنگ مسلط کی گئی تو پاکستان بھرپور جواب دینے کے لیے تیار ہے۔

گڑھی خدا بخش میں سابق وزیرِاعظم بے نظیر بھٹو کی برسی کے موقع پر جلسے سے خطاب کرتے ہوئے صدر آصف زرداری کا کہنا تھا کہ پاکستان کھپے کا نعرہ شہید بے نظیر بھٹو کا نعرہ تھا۔ انہوں نے کہا کہ بھارتی قیادت کو اب اندازہ ہو چکا ہے کہ پاکستان اپنا دفاع کرنا جانتا ہے۔

صدرِ مملکت نے کہا کہ اگر کوئی پاکستان کی طرف میلی آنکھ سے دیکھے گا تو اسے معلوم ہونا چاہیے کہ یہاں پیپلز پارٹی اور اس کے جیالے موجود ہیں۔ ان کا کہنا تھا کہ پاکستان نے ایسا آرمی چیف مقرر کیا جس نے بھارت کو منہ توڑ جواب دیا اور دشمن کو اپنی دفاعی صلاحیت کا احساس دلایا۔

آصف علی زرداری نے کہا کہ بھارت خود کو بڑی معیشت کہتا ہے مگر چار دن کی جنگ برداشت نہیں کر سکا، جبکہ پاکستان کے پاس وہ جرات اور حوصلہ ہے جو اس کے صدر، وزیرِاعظم اور فوجی قیادت میں موجود ہے۔

صدر آصف زرداری نے سابق حکومت پر تنقید کرتے ہوئے کہا کہ ایک نااہل شخص نے چار سال میں پاکستان کے عالمی تعلقات اور معیشت کو نقصان پہنچایا، تاہم موجودہ قیادت نے آہستہ آہستہ دنیا سے تعلقات بحال کیے ہیں اور اس عمل میں ملکی عسکری قیادت بھی ساتھ ہے۔