وزیراعلیٰ پنجاب مریم نواز کے بیٹے اور سابق وزیراعظم نواز شریف کے نواسے جنید صفدر آئندہ چند روز میں شادی کے بندھن میں بندھ جائیں گے۔ جنید صفدر کی شادی پاکستان مسلم لیگ (ن) کے سینئر رہنما اور سابق رکن قومی اسمبلی شیخ روحیل اصغر کی پوتی شانزے علی روحیل سے ہو رہی ہے۔
شادی کی تقریبات 16 جنوری 2026 سے شروع ہوں گی جبکہ بارات 17 جنوری کو لیک سٹی میں جائے گی۔ سوشل میڈیا پر وائرل کارڈ کے مطابق ولیمہ 18 جنوری 2026 کو شریف فارمز جاتِی اُمرا میں دوپہر ایک بجے منعقد ہوگا۔
اس سے قبل سابق رکن قومی اسمبلی شیخ روحیل اصغر نے تصدیق کی تھی کہ ان کی پوتی شانزے اور جنید صفدر جنوری میں شادی کے بندھن میں بندھ جائیں گے۔
واضح رہے کہ جنید صفدر پہلے بھی شادی کر چکے ہیں انہوں نے 2021 میں عائشہ سیف سے شادی کی تھی مگر یہ رشتہ زیادہ عرصے تک قائم نہ رہ سکا اور دونوں اکتوبر 2023 میں علیحدہ ہو گئے تھے۔