پاکستان مسلم لیگ (ن) کی سینئر رہنما اور صوبائی وزیر مریم اورنگزیب ان دنوں اپنی غیر معمولی ٹرانسفارمیشن کے باعث خبروں کی زینت بنی ہوئی ہیں۔ وزیراعلیٰ پنجاب مریم نواز کے بیٹے جنید صفدر کی شادی کی تقریبات میں مریم اورنگزیب کے نئے روپ نے سوشل میڈیا صارفین کو حیران کر دیا، جہاں کئی افراد نے اسے دیگر خواتین کے لیے متاثر کن مثال قرار دیا۔ شوبز شخصیات اور فیشن ناقدین نے بھی ان کے اس نئے انداز کو خوب سراہا جبکہ بشریٰ انصاری اور زارا نور عباس نے بھی ان کی ٹرانسفارمیشن کی تعریف کی۔
حال ہی میں مریم اورنگزیب کی والدہ طاہرہ اورنگزیب نے صحافی احسن وحید کو ایک مختصر انٹرویو دیتے ہوئے اپنی بیٹی کی اس تبدیلی کے راز سے پردہ اٹھایا۔
طاہرہ اورنگزیب نے بتایا کہ مریم پہلے کریش ڈائٹس پر انحصار کرتی تھیں۔ انہوں نے کہا میں نے کئی بار اسے روکنے کی کوشش کی لیکن وہ نہیں مانی۔ وہ دو سے تین ماہ تک صرف کافی یا چائے پیتی رہیں اور سخت ڈائٹس فالو کرتی تھیں۔
انہوں نے واضح کیا کہ مریم نے وزن کم کرنے کے لیے کسی قسم کی سرجری یا طبی طریقہ کار کا سہارا نہیں لیا بلکہ قدرتی طریقے سے وزن کم کیا۔ ان کا کہنا تھا اگر میں بھی اسی طرح کھانا چھوڑ دوں تو میرے چہرے کے پٹھے بھی متاثر ہوں گے۔
طاہرہ اورنگزیب کے مطابق مریم نے وزن بڑھنے کے باعث ڈائٹنگ شروع کی اور اپنی صحت کا خیال رکھنا ایک مثبت بات ہے۔ انہوں نے قیاس آرائیوں کو مسترد کرتے ہوئے کہا کہ لوگ بلاوجہ باتیں کر رہے ہیں انہیں اندازے لگانے دیں۔