ڈرامہ سیریل "کفیل" میں حالیہ قسطوں میں زیبا اور جمی کے چار بچوں کو دکھانے کے بعد ناظرین میں بحث شروع ہو گئی ہے۔ یہ ڈرامہ بگ بینگ انٹرٹینمنٹ کے تحت پروڈیوس کیا گیا ہے جبکہ کہانی عمیرہ احمد کی تحریر کردہ اور ڈائریکٹر میثم نقوی کی ہدایت کاری میں پیش کیا گیا ہے۔ ڈرامے میں عماد عرفانی، صنم سعید، منزہ عارف، کاشف محمود، جاوید رضوی اور دیگر اداکار شامل ہیں۔
ڈرامے کی کہانی میں جمی کا کردار ایک زہریلے اور گھر کے سکون کو برباد کرنے والے فرد کے طور پر دکھایا گیا ہے۔ اب تک 12 اقساط نشر کی جا چکی ہیں، جن میں حالیہ قسطوں میں بیس سال کے ٹائم جمپ کے بعد زیبا اور جمی کے خاندان کو اور ان کے چار بچوں کو متعارف کرایا گیا۔
ناظرین نے سوال کیا کہ زیبا اور جمی کے چار بچے دکھانے کی ضرورت کیوں پڑی، خاص طور پر جب ان کی شادی پیچیدہ اور مالی مشکلات سے بھری ہوئی تھی۔ کئی ناظرین نے زیبا کا دفاع کرتے ہوئے کہا کہ خاندان کے فیصلے صرف عورت کے اختیار میں نہیں ہوتے۔
کچھ کا کہنا تھا کہ پرانے زمانے میں لوگ سمجھتے تھے کہ بچوں کی ذمہ داری مردوں کو بدل سکتی ہے لیکن زیبا اور جمی کے معاملے میں ایسا نہیں ہوا۔
دوسری طرف کچھ ناظرین نے اچانک ٹائم جمپ اور چار بچوں کی آمد پر اعتراض کیا زیبا کو غیر معمولی اور جمی کو بے شرم قرار دیا کیونکہ وہ اب نوجوان لڑکی کے ساتھ تعلق رکھ رہا ہے۔ کچھ صارفین نے طنز کرتے ہوئے کہا کہ جمی بے روزگار تھا اور اس لیے انہوں نے بچوں کی تعداد بڑھائی۔ ایک ناظر نے یہ بھی تجویز دی کہ چار بچوں کا اضافہ شاید ڈائریکٹر کی ہدایت پر کیا گیا۔