بھارت کے نامور اور ساؤتھ انڈین فلم انڈسٹری کے سپر اسٹار رجنی کانت نے صفائی کا کام کرنے والی خاتون کی غیر معمولی ایمانداری سے متاثر ہو کر اسے سونے کی چین تحفے میں دے دی۔
خاتون پدما کی ایمانداری کا واقعہ حال ہی میں خبروں کی زینت بنا، جس کے بعد رجنی کانت نے اسے اپنی رہائش گاہ پر ملاقات کے لیے مدعو کیا۔ ملاقات کے دوران اداکار نے پدما کی دیانت داری اور کردار کو سراہتے ہوئے اسے سونے کی چین بطور تحفہ پیش کی۔
رجنی کانت کی ٹیم کی جانب سے اس موقع کی تصاویر سماجی رابطے کی ویب سائٹ ایکس سمیت دیگر سوشل میڈیا پلیٹ فارمز پر شیئر کی گئیں، جس کے بعد مداحوں کی جانب سے اداکار کے اس اقدام کو خوب سراہا جا رہا ہے۔ سوشل میڈیا صارفین نہ صرف رجنی کانت کے انسان دوست رویے کی تعریف کر رہے ہیں بلکہ پدما کی ایمانداری کو بھی خراجِ تحسین پیش کیا جا رہا ہے۔
مداحوں کا کہنا ہے کہ رجنی کانت نے ایک بار پھر ثابت کر دیا کہ وہ نہ صرف فلمی دنیا بلکہ حقیقی زندگی میں بھی ایک بڑے انسان ہیں۔