انڈین آئیڈل کے پہلے سیزن کے فاتح اور معروف گلوکار ابھیجیت ساونت نے اریجیت سنگھ کے پلے بیک گلوکاری چھوڑنے کے اعلان کے بعد اہم انکشاف کیا ہے۔
اریجیت سنگھ نے گزشتہ ماہ سوشل میڈیا پر جذباتی پوسٹ کے ذریعے اعلان کیا تھا کہ وہ اب پلے بیک گلوکاری نہیں کریں گے اور اپنے اس سفر کو اختتام تک پہنچا رہے ہیں۔
ابھیجیت ساونت نے ایک انٹرویو میں کہا کہ بھارتی فلم انڈسٹری میں گلوکاروں کا استحصال کیا جاتا ہے، اور انہیں اتنی رقم بھی نہیں دی جاتی کہ وہ اپنی روزی روٹی آسانی سے چلا سکیں۔ انہوں نے کہا کہ گلوکار صرف گانا چاہتے ہیں اور کسی خاص پروڈیوسر کے ساتھ کام کرنا چاہتے ہیں، لیکن انہیں اکثر محدود معاوضہ دیا جاتا ہے، اور اگر وہ یہ قبول نہ کریں تو کوئی اور کر لے گا۔
ابھیجیت کے مطابق گلوکار جانتے ہیں کہ ان کی آواز کسی بڑے اسٹار کے لیے گانے میں استعمال ہونے پر زیادہ مقبولیت حاصل کرے گی، لیکن ان کے لیے مالی طور پر مناسب سہولت میسر نہیں ہوتی، جس سے انڈسٹری میں استحصال نمایاں ہوتا ہے۔