لاہور کی ضلع کچہری میں موبائل ایپس کے ذریعے مبینہ جوئے سے متعلق کیس کی سماعت کے دوران عدالت نے معروف یوٹیوبر سعد الرحمان (ڈکی بھائی) کے فریز بینک اکاؤنٹس بحال کرنے کا حکم دے دیا۔
کیس کی سماعت ضلع کچہری لاہور میں جوڈیشل مجسٹریٹ نے کی، جہاں ڈکی بھائی اپنی اہلیہ عروب جتوئی اور وکلاء کے ہمراہ عدالت میں پیش ہوئے۔
عدالت نے ڈکی بھائی کو یوٹیوب چینل پر ویڈیوز اپ لوڈ کرنے کی بھی مشروط اجازت دے دی۔ تاہم عدالت نے کیس کی مزید سماعت آئندہ تاریخ تک ملتوی کرتے ہوئے نیشنل سائبر کرائم انویسٹی گیشن ایجنسی (NCCIA) کے گواہوں کو طلب کرلیا۔
واضح رہے کہ ڈکی بھائی اور ان کی اہلیہ کے خلاف موبائل ایپس کے ذریعے مبینہ طور پر جوئے کی تشہیر سے متعلق تحقیقات جاری ہیں۔