اداکارہ عینا آصف نے حال ہی میں نجی ٹی وی پروگرام میں سیٹ پر سینئر اداکاروں کے رویے کے بارے میں کھل کر انکشافات کیے ہیں۔
اداکارہ نے بتایا کہ بڑے اسٹارز یا سینئر اداکار نئے یا چھوٹے اداکاروں کو چھوٹی چھوٹی باتوں پر ٹوکتے اور ان میں خامیاں نکالتے ہیں۔ عینا نے کہا کبھی کبھی اگر ہم کچھ بول دیں تو وہ ہمیں ایسے دیکھیں گے جیسے ہم نے بہت احمقانہ بات کر دی ہو حالانکہ یہ کوئی بڑی بات نہیں ہوتی۔
عینا آصف نے مزید کہا کہ سیٹ پر ایسی صورتحال بھی ہوتی ہے کہ جب میں کوئی اہم سین کر رہی ہوتی ہوں تو سینئر اداکار باتیں شروع کر دیتے ہیں یا ایسا کچھ کرتے ہیں کہ میری توجہ بٹ جائے۔
انہوں نے اپنے ردعمل کے بارے میں بتایا کہ پہلے انہیں بہت غصہ آتا تھا لیکن اب وہ اسے نظر انداز کر دیتی ہیں کیونکہ یہ ہر سیٹ پر اس قدر معمول کی بات بن چکی ہے کہ میں کہتی ہوں جانے دو کسی کو کتنا ہی روک لیں گے۔