اداکارہ اور میزبان ندا یاسر نے سوشل میڈیا ٹرولنگ سے متعلق بات کرتے ہوئے کہا ہے کہ زیادہ تر منفی تبصرے پیشہ ورانہ کام پر نہیں بلکہ ظاہری شکل و صورت پر کیے جاتے ہیں۔
حال ہی میں مارننگ شو میں جہاں اداکار جنید خان بھی بطور مہمان موجود تھے ندا یاسر نے کہا کہ سوشل میڈیا صارفین اکثر اداکاروں کی عمر، جسمانی ساخت یا ظاہری انداز کو نشانہ بناتے ہیں۔ ان کے مطابق لوگ ایسے سوالات کرتے ہیں جیسے پیٹ کیوں نظر آ رہا ہے؟ یا کوئی گنجا کیوں لگ رہا ہے؟ جو کہ غیر ضروری اور منفی رویے کی عکاسی کرتے ہیں۔
ندا یاسر نے کہا کہ ان کی معمولی غلطیاں بھی وائرل ہو جاتی ہیں جس کے بعد انہیں شدید ٹرولنگ کا سامنا کرنا پڑتا ہے۔ انہوں نے مزید کہا کہ بعض لوگ اپنی ذاتی مایوسی کی وجہ سے دوسروں پر تنقید کرتے ہیں۔
اس موقع پر جنید خان نے اپنی رائے دیتے ہوئے کہا کہ وہ سوشل میڈیا پر منفی تبصروں کو سنجیدہ نہیں لیتے اور اکثر انہیں نظر انداز کر دیتے ہیں۔ تاہم ان کا کہنا تھا کہ بعض اوقات عوام کی تنقید درست بھی ہوتی ہے اس لیے انسان کو اپنی غلطیوں پر بھی توجہ دینی چاہیے۔