یوٹیوبر رجب بٹ کے خلاف حیدری تھانے میں درج مقدمے کے معاملے پر سندھ ہائی کورٹ نے مقدمہ کراچی سے باہر منتقل کرنے کی درخواست پر سماعت مقرر کردی ہے۔
رجب بٹ نے اپنے وکیل میاں علی اشفاق کے توسط سے عدالتِ عالیہ سے رجوع کرتے ہوئے موقف اختیار کیا ہے کہ انہیں کراچی میں پیشی کے دوران سیکیورٹی کے شدید خطرات لاحق ہیں۔
درخواست گزار کے وکیل کے مطابق، سٹی کورٹ میں پیشی کے موقع پر ضمانت کے باوجود رجب بٹ پر تشدد کیا گیا، جس کی وجہ سے ان کا کراچی میں دوبارہ پیش ہونا محفوظ نہیں۔
عدالت نے درخواست کی فوری سماعت کی استدعا منظور کرتے ہوئے اسے 4 مئی کے لیے مقرر کردیا ہے۔
عدالت نے فریقین کو ہدایت جاری کی ہے کہ وہ آئندہ سماعت تک اپنا جواب جمع کروائیں، جبکہ درخواست میں استدعا کی گئی ہے کہ جان و مال کے تحفظ کو یقینی بنانے کے لیے کیس کو کراچی سے کسی دوسرے شہر منتقل کیا جائے۔