معروف پاکستانی یوٹیوبر اور سوشل میڈیا انفلوئنسر رجب بٹ نے اپنے بیٹے کیوان سلطان سے متعلق سوشل میڈیا پر وائرل ہونے والی ویڈیو کے حوالے سے وضاحت پیش کرتے ہوئے اس کی حقیقت سے پردہ اٹھا دیا ہے۔
حالیہ دنوں ایک مبینہ ویڈیو نے سوشل میڈیا صارفین میں شدید بحث کو جنم دیا، جس میں رجب بٹ کو اپنے بیٹے کے ساتھ دکھایا گیا تھا تاہم انہوں نے اس ویڈیو کو مکمل طور پر بے بنیاد قرار دیتے ہوئے کہا ہے کہ یہ مصنوعی ذہانت کے ذریعے تیار کی گئی ہے اور اس کا حقیقت سے کوئی تعلق نہیں۔
رجب بٹ کے مطابق اگر وہ اپنے بیٹے کو عوام کے سامنے لانا چاہتے تو خود اپنے یوٹیوب چینل کے ذریعے اس کی ویڈیو جاری کرتے، انہوں نے اس تاثر کو بھی مسترد کیا کہ ان کے قریبی افراد نے کوئی ویڈیو لیک کی ہے بلکہ ان کا کہنا تھا کہ لوگ دراصل ایک جعلی ویڈیو پر ردعمل دے رہے ہیں جو جدید ٹیکنالوجی کا نتیجہ ہے۔
انہوں نے مزید کہا کہ عوام کی جانب سے اس معاملے پر دلچسپی دراصل ان سے محبت کا اظہار ہے، ساتھ ہی انہوں نے اپنے بیٹے سمیت تمام بچوں کے لیے نیک خواہشات کا اظہار کیا اور زیر گردش طلاق سے متعلق افواہوں پر بھی ردعمل دیتے ہوئے دعا کی کہ اللہ سب کے لیے آسانیاں پیدا فرمائے۔
واضح رہے کہ رجب بٹ کی شادی ایمان فاطمہ کے ساتھ نہایت دھوم دھام سے ہوئی تھی تاہم یہ رشتہ زیادہ عرصہ قائم نہ رہ سکا، شادی کے کچھ عرصے بعد رجب بٹ بیرون ملک منتقل ہو گئے جبکہ ایمان فاطمہ حمل کے باعث پاکستان میں ہی مقیم رہیں، بعد ازاں دونوں کے درمیان علیحدگی ہو گئی اور ان کا بیٹا کیوان سلطان اس وقت اپنی والدہ کے ساتھ رہ رہا ہے۔