پاکستانی ڈرامہ انڈسٹری میں تیزی سے مقبول ہونے والے اداکار حسن خان نے اپنی نجی زندگی کے ایسے پہلوؤں سے پردہ اٹھایا ہے جنہوں نے مداحوں کو جذباتی کر دیا ہے۔
حالیہ دنوں میں ڈرامہ کفیل میں ’جمال‘ کے کردار سے شہرت حاصل کرنے والے حسن خان نے ایک انٹرویو میں اپنی شادی، جدوجہد اور بیٹے کی شدید بیماری سے متعلق دل چھو لینے والی باتیں شیئر کیں۔
اداکار جو ناپا سے فارغ التحصیل ہیں، نے 2019 میں اپنے کیریئر کا آغاز کیا اور اب تک محدود مگر منتخب پروجیکٹس میں کام کیا ہے۔ ان کا کہنا تھا کہ انہیں ہمیشہ اپنے معیار کے مطابق کام تلاش کرنے میں مشکلات کا سامنا رہا، مگر ان کی اہلیہ اور بچوں نے ہر مشکل وقت میں ان کا سہارا بن کر انہیں سنبھالا۔
حسن خان نے اپنی ازدواجی زندگی کے بارے میں بات کرتے ہوئے کہا کہ شادی انسان کی قسمت بدل دیتی ہے، کیونکہ ایک عورت کی تقدیر بھی اس کے ساتھ جڑ جاتی ہے۔
انہوں نے بتایا کہ نکاح کے وقت وہ زندگی میں پہلی بار حقیقی خوف کا شکار ہوئے، کیونکہ اس لمحے انہیں ایک نئی ذمہ داری کا احساس ہوا، تاہم ان کے مطابق نکاح برکت کا ذریعہ بنتا ہے اور انہوں نے اپنی زندگی میں اس کی برکت کو محسوس بھی کیا۔
اداکار نے اپنی زندگی کے سب سے مشکل دور کا ذکر کرتے ہوئے بتایا کہ ان کا بڑا بیٹا ڈیڑھ سال کی عمر میں شدید بیمار ہو گیا تھا۔
وہ ایک ماہ سے زائد عرصے تک انتہائی نگہداشت وارڈ (آئی سی یو) میں زیر علاج رہا جبکہ 10 دن تک وینٹی لیٹر پر بھی رکھا گیا۔ حسن خان کے مطابق یہ وہ تکلیف دہ وقت تھا جس کا انہوں نے کبھی تصور بھی نہیں کیا تھا۔
خوش قسمتی سے ان کا بیٹا اس خطرناک مرحلے سے نکل آیا، جسے وہ کسی معجزے سے کم نہیں سمجھتے۔ اداکار کا کہنا تھا کہ اس واقعے کے بعد ان کے بیٹے کی اہمیت ان کی زندگی میں مزید بڑھ گئی اور وہ اس کی ہر شرارت کو بھی محبت سے نظرانداز کر دیتے ہیں۔
حسن خان کی یہ کہانی نہ صرف ان کی پیشہ ورانہ کامیابی بلکہ ذاتی زندگی میں پیش آنے والے کٹھن امتحانات اور خاندانی محبت کی طاقت کو بھی اجاگر کرتی ہے جس نے انہیں ایک مضبوط انسان بنا دیا۔