ابھرتی ہوئی پاکستانی اداکارہ حنا طارق نے شادی اور نکاح سے متعلق اپنے خیالات کھل کر بیان کرتے ہوئے کہا ہے کہ وہ نہ صرف اپنا نکاح نامہ خود پڑھیں گی بلکہ حق مہر کی شرائط بھی اپنی مرضی سے طے کریں گی۔
اداکارہ ان دنوں ڈرامہ سیریل رحمت میں ’پریشے‘ کے کردار کے ذریعے ناظرین کی بھرپور توجہ حاصل کر رہی ہیں اور ان کی اداکاری کو خاصی پذیرائی مل رہی ہے۔ حال ہی میں ایک پروگرام میں گفتگو کرتے ہوئے انہوں نے اپنی ذاتی زندگی اور مستقبل کے منصوبوں پر بھی اظہار خیال کیا۔
حنا طارق کا کہنا تھا کہ ان کی دیرینہ خواہش ہے کہ وہ اپنے حق مہر میں مالی مطالبات کے بجائے مذہبی فریضے کو شامل کریں۔ انہوں نے واضح کیا کہ وہ چاہتی ہیں کہ ان کے حق مہر میں حج یا عمرہ کی ادائیگی کی شرط درج ہو کیونکہ ان کے نزدیک اس کی اہمیت دولت سے کہیں زیادہ ہے۔
انہوں نے اس بات پر بھی زور دیا کہ موجودہ دور میں معاشرتی رویوں میں نمایاں تبدیلی آ چکی ہے۔ ان کے مطابق آج کل نوجوان ایک دوسرے کے ماضی کے بارے میں زیادہ سوال نہیں کرتے اور طلاق یافتہ ہونے یا دیگر ذاتی معاملات کو پہلے کی طرح اہمیت نہیں دی جاتی۔
اداکارہ کے اس بیان نے سوشل میڈیا اور شوبز حلقوں میں نئی بحث چھیڑ دی ہے جہاں کچھ افراد ان کے خیالات کو سراہ رہے ہیں جبکہ کچھ اسے روایتی سوچ سے ہٹ کر قرار دے رہے ہیں۔