محکمہ ثقافت حکومت بلوچستان نے ٹیلنٹ ہنٹ موسیقی مقابلے کے انعقاد کا اعلان کردیا، جس کا مقصد نوجوانوں کی صلاحیتوں کو اجاگر کرنا اور انہیں مثبت سرگرمیوں کی جانب راغب کرنا ہے۔
حکام کے مطابق ایمان پاکستان حق میلہ 19 سے 24 مئی تک نوری نصیر خان کلچر کمپلیکس میں منعقد ہوگا۔ میلے کا انعقاد محکمہ ثقافت بلوچستان اور ایمان پاکستان کے اشتراک سے کیا جا رہا ہے۔
میلے کی تیاریوں کے جائزے کے دوران فرح عظیم شاہ نے انتظامات کا معائنہ کیا، جبکہ پارلیمانی سیکریٹری زرین مگسی نے کہا کہ تعلیمی اداروں کے طلبا کو خصوصی طور پر شرکت کی دعوت دی گئی ہے۔
انہوں نے کہا کہ یہ ایونٹ نوجوانوں کو مثبت اور تخلیقی سرگرمیوں کی جانب لانے میں اہم کردار ادا کرے گا۔ ان کے مطابق موسیقی کے مقابلوں کے ساتھ ساتھ ثقافتی اور فوڈ اسٹالز سمیت مختلف نمائشوں کا بھی اہتمام کیا جائے گا۔