ڈی جی اسپورٹس پنجاب محمد طارق قریشی کی زیر صدارت سی ایم پنجاب چیمپئن لیگ کے انتظامات کے حوالے سے اہم اجلاس منعقد ہوا، جس میں لیگ کی تیاریوں کا تفصیلی جائزہ لیا گیا۔ یہ چیمپئن لیگ پاکستان کرکٹ بورڈ کے تعاون سے کروائی جا رہی ہے، جس میں انٹرنیشنل اور نیشنل سطح کے نامور کرکٹرز ایکشن میں نظر آئیں گے۔
اجلاس میں قومی ویمن کرکٹ ٹیم کی سابق کپتان ندا ڈار، ڈائریکٹر اسپورٹس لاہور کالج فار ویمن یونیورسٹی ڈاکٹر سمیرا ستار، ڈائریکٹر اسپورٹس کینئرڈ کالج ڈاکٹر عمارہ رباب، ڈائریکٹر اسپورٹس پنجاب یونیورسٹی شبیر سرور، ڈائریکٹر اسپورٹس یونیورسٹی آف لاہور محمد عقیل رانا اور ڈپٹی ڈائریکٹر ظہور احمد سمیت دیگر اعلیٰ حکام نے شرکت کی۔
اجلاس کے دوران ڈی جی اسپورٹس پنجاب محمد طارق قریشی نے بتایا کہ سی ایم پنجاب چیمپئن کرکٹ لیگ میں مجموعی طور پر 12 مردوں اور 4 خواتین کی ٹیمیں شرکت کررہی ہیں۔ پنجاب بھر سے خواتین کی 4 ٹیمیں اس ٹورنامنٹ کا حصہ ہوں گی اور ان خواتین ٹیموں کے تمام تر انتظامات اور دیکھ بھال کی ذمہ داری قومی کرکٹ ٹیم کی سابق کپتان ندا ڈار سنبھال رہی ہیں۔
انہوں نے مزید بتایا کہ سی ایم پنجاب چیمپئن لیگ میں خواتین کے کرکٹ مقابلے جولائی کے آخری ہفتے میں منعقد کیے جائیں گے۔ ٹورنامنٹ کے تمام ابتدائی میچز نواب ٹاؤن کرکٹ اسٹیڈیم میں کھیلے جائیں گے، جبکہ اس تاریخی چیمپئن لیگ کا فائنل میچ قذافی اسٹیڈیم لاہور میں کھیلا جائے گا۔ پنجاب حکومت اور محکمہ کھیل اس لیگ کے شاندار اور کامیاب انعقاد کے لیے تمام تر تیاریاں تیزی سے مکمل کررہے ہیں۔