فٹبال میچ کے دوران گول کیپر سے تصادم کے بعد 30 سالہ فارورڈ جیسس ڈی میگوئل انتقال کرگئے، واقعے نے فٹبال کی دنیا کو سوگوار کردیا۔
ایف سی اینڈورا کے گول کیپر جیسس اوونو میچ کے آخری لمحات میں گول سے باہر آئے اور ٹینیریف کے کھلاڑی ڈی میگوئل سے ٹکرا گئے۔ تصادم کے دوران گول کیپر کا گھٹنا ڈی میگوئل کے سینے پر لگا جس سے وہ میدان میں گر پڑے۔
طبی عملے نے انہیں اسپتال منتقل کیا، جہاں انہیں دل کا دورہ پڑا اور اگلی صبح موت کی تصدیق کردی گئی۔
گول کیپر جیسس اوونو نے واقعے پر گہرے دکھ کا اظہار کرتے ہوئے کہا کہ یہ ان کی زندگی کے مشکل ترین دن ہیں اور وہ تاحال اس سانحے کو سمجھنے سے قاصر ہیں۔
واقعے کی تحقیقات جاری ہیں جبکہ پراسیکیوٹر کے مطابق گول کیپر کے خلاف فوجداری کارروائی کا امکان انتہائی کم ہے۔