پاکستان کرکٹ بورڈ نے قومی خواتین کرکٹ ٹیم کی کارکردگی کو بہتر بنانے کے لیے ویسٹ انڈیز کی خواتین ٹیم کے سابق ہیڈ کوچ شین ڈیئٹز کو ذمہ داری سونپنے کی کوششیں شروع کردی ہیں۔
ذرائع کے مطابق 51 سالہ سابق آسٹریلین کرکٹر شین ڈیئٹز ویسٹ انڈیز کے ساتھ اپنا تین سالہ معاہدہ 31 اکتوبر کو ختم ہونے کے بعد عہدے سے الگ ہو چکے ہیں۔
پی سی بی کو خواتین کرکٹ اور کیریبین ٹیم کے ساتھ ان کے کام کا انتہائی مثبت فیڈ بیک ملا ہے، جس کے پیش نظر بورڈ ان کے ساتھ 2 سے 3 سال کا معاہدہ طے کرنا چاہتا ہے تا کہ 2028 میں پاکستان کی میزبانی میں ہونے والے آئی سی سی ویمنز T20 ورلڈ کپ کے لیے ایک مضبوط ٹیم تیار کی جاسکے۔
پی سی بی نے اس سے قبل ویمنز ٹیم کے مینٹور کے طور پر کام کرنے والے سابق ٹیسٹ فاسٹ باؤلر وہاب ریاض کو ہٹانے کا فیصلہ کیا ہے، جن کے دور میں ٹیم کوئی خاص کامیابی حاصل نہیں کر سکی تھی۔ گزشتہ سال سے سابق ٹیسٹ کھلاڑی عمران فرحت، عبدالرحمٰن اور عمید آصف بطور کوچز ٹیم کے ساتھ منسلک ہیں۔
پی سی بی کی خواہش ہے کہ شین ڈیئٹز دسمبر میں متوقع کیریبین دورے کی سیریز سے قبل ہی ویمنز ٹیم کا چارج سنبھال لیں، جس کے شیڈول کا اعلان جلد متوقع ہے۔
دوسری جانب کرکٹ ویسٹ انڈیز نے سابق مردانہ ٹیم کے ہیڈ کوچ اینڈرے کولی کو اپنی خواتین ٹیم کا عبوری ہیڈ کوچ مقرر کردیا ہے۔