اسپورٹس بورڈ پنجاب کے زیر اہتمام سی ایم پنجاب اسپورٹس اکیڈیمز کا سلسلہ کامیابی سے جاری ہے، جہاں جمنازیم ہال میں باسکٹ بال، بیڈمنٹن اور ٹیبل ٹینس اکیڈیمز میں بچوں کو مختلف سیشنز میں تربیت دی جا رہی ہے۔
اس سلسلے میں بیڈمنٹن اکیڈمی میں 230 گرلز اور بوائز کو 3 سیشنز میں کوچ ساجد، باسکٹ بال اکیڈمی میں 80 گرلز اینڈ بوائز کو سینئر کوچ شائستہ قیصر، جبکہ ٹیبل ٹینس اکیڈمی میں 40 بچوں کو کوچ یاسر نے تربیت فراہم کی۔
ڈی جی اسپورٹس پنجاب محمد طارق قریشی کا کہنا ہے کہ نشتر پارک سپورٹس کمپلیکس میں اس وقت 2500 سے زائد گرلز اور بوائز ٹریننگ کر رہے ہیں اور تمام اسپورٹس اکیڈیمز میں 6 سے 19 سال کے بچوں کو بالکل مفت تربیت دی جا رہی ہے۔ انہوں نے مزید بتایا کہ نشتر پارک اسپورٹس کمپلیکس میں قائم یہ 19 اسپورٹس اکیڈیمز سارا سال بچوں کو کھیل سکھائیں گی، جبکہ ان اسپورٹس اکیڈیمز کا دائرہ کار اب پنجاب کے تمام ڈویژنز تک بڑھایا جا رہا ہے۔