پاکستان کے سابق عظیم بلے باز اور کپتان ظہیر عباس نے کہا ہے کہ انہیں پورا یقین ہے کہ بھارتی کرکٹ کے نامور بلے باز ویرات کوہلی اور روہت شرما دونوں اگلے سال ہونے والے آئی سی سی 50 اوورز ورلڈ کپ میں شرکت کریں گے۔
نجی ٹی وی چینل پر بات کرتے ہوئے ظہیر عباس نے کہا کہ دونوں بھارتی بلے باز اب بھی بہترین فارم میں ہیں۔ ان کا کہنا تھا کہ مہارت کے لحاظ سے دونوں زبردست ہیں اور ان کے تجربے کو دیکھتے ہوئے کوئی ایسی وجہ نظر نہیں آتی کہ وہ ورلڈ کپ نہ کھیلیں۔ جب تک کھلاڑی فٹ ہیں اور رنز بنا رہے ہیں، عمر کو رکاوٹ نہیں بننا چاہیے۔ انہوں نے مزید کہا کہ کوہلی اب بھی انتہائی فٹ ہیں جبکہ روہت کو صرف اپنی فٹنس پر تھوڑی سی توجہ دینے کی ضرورت ہے، اور بھارت کو جنوبی افریقہ، زمبابوے اور نمیبیا میں منعقد ہونے والے ورلڈ کپ میں ان کے تجربے کی یقیناً ضرورت ہوگی۔
ٹی ٹوئنٹی کرکٹ کے حوالے سے گفتگو کرتے ہوئے انہوں نے نوٹ کیا کہ اگرچہ اس فارمیٹ نے کئی نئے اور تخلیقی شاٹس متعارف کرائے ہیں، لیکن کسی بھی فارمیٹ میں ٹاپ بلے باز بننے کے لیے کھلاڑی کو کور ڈرائیو اور کٹ شاٹ پر عبور حاصل ہونا ضروری ہے۔
پاکستان کرکٹ کے بارے میں بات کرتے ہوئے ظہیر عباس نے کرکٹ شائقین پر زور دیا کہ وہ صبر سے کام لیں اور کھلاڑیوں سے مایوس نہ ہوں۔ انہوں نے امید ظاہر کی کہ ٹیسٹ کپتان کے طور پر بابر اعظم کی واپسی سے حالات بدل جائیں گے، کیونکہ وہ ایک عالمی سطح کے کھلاڑی ہیں اور جب وہ دوبارہ تسلسل کے ساتھ رنز بنانا شروع کریں گے تو اس کا مثبت اثر دوسرے کھلاڑیوں پر بھی پڑے گا اور پاکستان کرکٹ میں اچھے دن ضرور واپس آئیں گے۔