انگلینڈ اینڈ ویلز کرکٹ بورڈ (ای سی بی) نے نیوزی لینڈ کے سابق کپتان اسٹیفن فلیمنگ کو انگلینڈ ٹیسٹ کرکٹ ٹیم کا ہیڈ کوچ مقرر کرنے کی تصدیق کر دی ہے جب کہ قومی ٹیم کے ایک نئے دور کے آغاز سے قبل جو روٹ کو دوبارہ ٹیسٹ کپتان بنا دیا گیا ہے۔
دنیا کی کرکٹ کے بہترین کوچز میں شمار ہونے والے 53 سالہ فلیمنگ نے (سی ایس کے) کے ساتھ اپنے شاندار 18 سالہ طویل سفر کے بعد یہ ذمہ داری سنبھالی ہے جہاں انہوں نے اس فرنچائز کو ریکارڈ برابر کرتے ہوئے پانچ انڈین پریمیئر لیگ (آئی پی ایل) کے ٹائٹلز اور 10 فائنلز تک پہنچایا۔
فلیمنگ کا بطور کھلاڑی بھی ایک شاندار کیریئر رہا ہے انہوں نے نیوزی لینڈ کی جانب سے اس وقت کے ریکارڈ 80 ٹیسٹ میچوں میں کپتانی کی اور اپنی ٹیم کو 28 فتوحات دلائیں جو کہ کسی بھی نیوزی لینڈ کے ٹیسٹ کپتان کی طرف سے سب سے زیادہ ہیں۔
اپنے کاؤنٹی کیریئر کے دوران انہوں نے مڈل سیکس، یارکشائر اور ناٹنگھم شائر کی نمائندگی کی، اور 2005 میں ناٹنگھم شائر کو 18 سال بعد ان کا پہلا کاؤنٹی چیمپئن شپ ٹائٹل جتا کر تاریخ رقم کی۔
ای سی بی کے مطابق فلیمنگ کا تقرر کئی اعلیٰ درجے کے امیدواروں پر مشتمل ایک سخت ترین بھرتی کے عمل کے بعد عمل میں آیا ہے اور سلیکشن پینل نے متفقہ طور پر نیوزی لینڈ کے سابق کپتان کے نام کی توثیق کی۔اگرچہ فلیمنگ کا تقرر فوری طور پر کر دیا گیا ہے، لیکن وہ باضابطہ طور پر پاکستان کے خلاف انگلینڈ کی آنے والی روٹسی ٹیسٹ سیریز کے آغاز کے بعد کوچنگ کے فرائض سنبھالیں گے۔
توقع ہے کہ وہ اس موسم گرما کے آخر میں انگلینڈ پہنچیں گے اور اس کے بعد انگلینڈ کے دورہ جنوبی افریقا کے ٹیسٹ میچوں کی تیاریوں کا آغاز کریں گے۔
دوسری طرف، روٹ نے ایک بار پھر ٹیم کی باگ ڈور سنبھال لی ہے، اس سے قبل وہ انگلینڈ کے لیے ریکارڈ 65 ٹیسٹ میچوں میں کپتانی کر چکے ہیں جن میں انہوں نے 27 فتوحات حاصل کیں یہ دونوں قومی ریکارڈ ہیں۔
یارکشائر سے تعلق رکھنے والے اس بلے باز نے اس سے قبل 2017 اور 2022 کے درمیان انگلینڈ کی کپتانی کی تھی اور اس موسم گرما کے شروع میں نیوزی لینڈ کے خلاف روٹسی ٹیسٹ سیریز کے دوران مختصر طور پر عبوری بنیادوں پر دوبارہ یہ ذمہ داری سنبھالی تھی۔
اپنے تقرر کے بعد گفتگو کرتے ہوئے فلیمنگ نے کرکٹ کے سب سے معزز کوچنگ عہدوں میں سے ایک کا چارج سنبھالنے پر اپنے جوش و خروش کا اظہار کیا۔
فلیمنگ نے کہا میں انگلینڈ کا ٹیسٹ کوچ بننے پر انتہائی پرجوش ہوں۔ یہ عالمی کرکٹ میں کوچنگ کے سب سے معزز عہدوں میں سے ایک ہے اور میں اس پر تقرر ہونے پر فخر محسوس کرتا ہوں۔
انہوں نے سابق ہیڈ کوچ برینڈن میک کولم اور سابق کپتان بین اسٹوکس کے دور میں ہونے والی ترقی کی تعریف کی، اور ساتھ ہی مسلسل کامیابی حاصل کرنے کے اپنے عزم کا اظہار کیا۔
میں کھلاڑیوں کے ساتھ کام کرنے اور برینڈن میک کولم اور بین اسٹوکس کی طرف سے کی گئی پیش رفت کو آگے بڑھانے کا منتظر ہوں۔ یقیناً مقصد ہمیشہ فوری طور پر جیتنا ہوتا ہے لیکن یہ بھی اتنا ہی اہم ہے کہ ٹیم کو درمیانی اور طویل مدت کے مستقبل کے لیے بہترین پوزیشن میں رکھا جائے۔
فلیمنگ نے جو روٹ اور ابھرتے ہوئے ستارے ہیری بروک کے ساتھ مل کر کام کرنے کی اپنی شدید خواہش کا بھی اظہار کیا۔ میں بطور کپتان جو روٹ کے ساتھ کام کرنے کا خاص طور پر منتظر ہوں۔ وہ ایک باصلاحیت کھلاڑی ہیں جنہوں نے پہلے ہی بہت کچھ حاصل کیا ہے اور میرا ماننا ہے کہ ان کی طرف سے ابھی بہت کچھ آنا باقی ہے۔
میں ہیری بروک کے ساتھ کام کرنے کے لیے بھی پرجوش ہوں۔ بہترین کھلاڑی کبھی بھی مکمل طور پر تیار شدہ نہیں ہوتے اور ہیری کو ان کی غیر معمولی صلاحیت اور قیادت کو مزید نکھارنے میں مدد کرنا اس سفر کا ایک اہم حصہ ہوگا۔
بین الاقوامی کپتان کے طور پر اپنے ذاتی تجربات پر روشنی ڈالتے ہوئے فلیمنگ نے کہا کہ انگلش کرکٹ نے کھیل کے لیے ان کے جذبے کو دوبارہ بیدار کرنے میں اہم کردار ادا کیا ہے۔