پاکستانی اداکارہ مومنہ اقبال کے شوہر حمزہ نے سوشل میڈیا پر ایک نامعلوم شخص کو مخاطب کرتے ہوئے سخت پیغام جاری کیا ہے اور اسے اپنی 'آخری اسٹوری' قرار دیا ہے۔
انسٹاگرام پر جاری کردہ پیغام میں حمزہ نے ایک شخص کو 'ڈسکو کوٹ والے انکل' کہہ کر مخاطب کیا اور اس پر بے ایمانی کے شدید الزامات عائد کرتے ہوئے اپنے غصے کا اظہار کیا۔ انہوں نے کہا کہ انسان کے اعمال بالآخر اس کے کردار اور ظاہری شخصیت سے ظاہر ہو جاتے ہیں اور ظاہری شکل و صورت یا کاسمیٹک ٹریٹمنٹس اور انجیکشنز کے استعمال سے غلط اعمال کے نتائج کو ختم نہیں کیا جا سکتا۔ ان کا کہنا تھا کہ اصل تبدیلی ظاہری شکل بدلنے سے نہیں بلکہ اپنے اعمال درست کرنے سے آتی ہے۔
پیغام کے اختتام پر حمزہ نے جھوٹے بیانیے بنانے کی کوششوں کو مسترد کرتے ہوئے دعویٰ کیا کہ حقیقت جلد سامنے آ جائے گی اور مذکورہ شخص کو قانونی نتائج کا سامنا کرنا پڑے گا۔ انہوں نے مزید کہا کہ جب اس شخص کی جیل کی سلاخوں کے پیچھے سے تصاویر سامنے آئیں گی تو سب کو اصل حقیقت کا علم ہو جائے گا۔ واضح رہے کہ حمزہ نے اپنے اس سخت پیغام میں کسی کا نام نہیں لیا ہے۔