’’آج کل تو ایسا لگتا ہے جیسے اپنوں کی محبت بھی پیسوں سے خریدنی پڑتی ہے۔ خون کے رشتے بھی بے رحم ہوتے جا رہے ہیں۔ اگر آپ اپنے عزیزوں پر پیسہ خرچ کرتے رہیں، انہیں مہنگے تحفے دیتے رہیں تو تعلقات اچھے رہتے ہیں، لیکن جیسے ہی خرچ کرنا بند کریں، محبت بھی کم ہونے لگتی ہے۔ یہی حال بچوں اور دوستوں کا بھی ہے۔ بچوں کو محبت کے ساتھ پیسہ دیں تو وہ زیادہ خیال رکھتے ہیں، دوستوں پر خرچ نہ کریں تو وہ بھی دور ہونے لگتے ہیں۔ اب ایسا محسوس ہوتا ہے کہ رشتوں میں محبت، خلوص اور اپنائیت حاصل کرنے کے لیے بھی قیمت ادا کرنا پڑتی ہے۔‘‘
پاکستان کی سینئر اداکارہ بشریٰ انصاری نے معاشرے میں بدلتے ہوئے رشتوں اور محبت کے پیچھے چھپے مفادات پر کھل کر بات کرتے ہوئے کہا ہے کہ آج کے دور میں بہت سے لوگ تعلقات کو بھی مالی فائدے سے جوڑنے لگے ہیں۔
بشریٰ انصاری نے اپنے یوٹیوب چینل پر جاری کیے گئے حالیہ وی لاگ میں زندگی کے تجربات شیئر کرتے ہوئے بتایا کہ وقت کے ساتھ انہیں احساس ہوا ہے کہ بعض اوقات اپنے ہی لوگ تب تک محبت اور توجہ دیتے ہیں جب تک ان پر پیسہ خرچ کیا جاتا رہے۔
اداکارہ کے مطابق پہلے خونی رشتوں کو بے لوث محبت اور اعتماد کی علامت سمجھا جاتا تھا، لیکن اب بہت سے تعلقات میں مالی توقعات بڑھ گئی ہیں۔ انہوں نے افسوس کا اظہار کیا کہ بعض لوگ رشتوں کی اہمیت محبت اور خلوص کے بجائے ملنے والے تحائف اور مالی مدد سے طے کرنے لگے ہیں۔
بشریٰ انصاری نے کہا کہ یہ رویہ صرف رشتے داروں تک محدود نہیں بلکہ بعض اوقات بچوں اور دوستوں کے ساتھ تعلقات میں بھی نظر آتا ہے۔ ان کے بقول اگر آپ دوسروں کی ضروریات پوری کرتے رہیں تو وہ آپ کے قریب رہتے ہیں، لیکن مالی تعاون کم ہونے پر ان کے رویے میں بھی تبدیلی محسوس ہونے لگتی ہے۔
انہوں نے اس صورتحال کو افسوسناک قرار دیتے ہوئے کہا کہ محبت اور اپنائیت جیسے جذبات کو پیسے سے مشروط نہیں ہونا چاہیے، کیونکہ رشتوں کی اصل خوبصورتی بے لوث خلوص اور ایک دوسرے کا ساتھ دینے میں ہے۔
تاہم بشریٰ انصاری نے یہ بھی واضح کیا کہ ان کی زندگی میں تمام لوگ ایسے نہیں ہیں۔ انہوں نے بتایا کہ ان کے چند دوست آج بھی ایسے ہیں جنہوں نے کبھی ان سے کسی مالی فائدے یا تحفے کی توقع نہیں رکھی اور زندگی کے مختلف مراحل میں ان کا ساتھ نبھایا۔
اداکارہ کے مطابق یہی مخلص دوستیاں ان کے لیے بہت قیمتی ہیں، کیونکہ ان کی بنیاد کسی فائدے کے بجائے سچی محبت اور اعتماد پر قائم ہے۔
واضح رہے کہ بشریٰ انصاری پاکستان کی مقبول ترین سینئر فنکاراؤں میں شمار ہوتی ہیں۔ ففٹی ففٹی، آنگن ٹیڑھا، بارات سیریز، اڈاری، تیرے بن اور کبھی میں کبھی تم سمیت متعدد کامیاب ڈراموں میں اپنی اداکاری سے ناظرین کے دل جیتنے والی اداکارہ آج کل اپنے یوٹیوب وی لاگز کے ذریعے زندگی کے تجربات اور معاشرتی مسائل پر بھی گفتگو کرتی رہتی ہیں۔