پورٹ آف اسپین میں پاکستان اور ویسٹ انڈیز کے درمیان کھیلے جانے والے دوسرے ٹیسٹ میچ میں پاکستان نے بلے باز اویس ظفر اور فاسٹ باؤلر عبید شاہ کو ٹیسٹ کیپ پیش کر دی ہیں، تاہم بارش کے باعث میچ کا آغاز تاخیر کا شکار ہے۔
ان دو نئے کھلاڑیوں کے ڈیبیو کے بعد جولائی 2022ء کے بعد سے اب تک کھیلے گئے 27 ٹیسٹ میچوں میں پاکستان کی جانب سے کیپ حاصل کرنے والے کھلاڑیوں کی تعداد 19 ہو گئی ہے۔
پاکستان کی ٹیم 33 سال کے طویل عرصے بعد تاریخی کوئینز پارک اوول کے میدان میں کھیل رہی ہے، جہاں اس نے آخری بار 1993ء میں میچ کھیلا تھا اور اسے شکست کا سامنا کرنا پڑا تھا۔ ویسٹ انڈیز نے پہلے ٹیسٹ کی طرح ایک بار پھر ٹاس جیت کر پہلے بلے بازی کرنے کا فیصلہ کیا ہے اور اپنی فائنل الیون میں کوئی تبدیلی نہیں کی۔
پاکستان کی فائنل الیون میں مجموعی طور پر چار تبدیلیاں کی گئی ہیں۔ پہلے ٹیسٹ میں سنچری بنانے کے بعد انگلی کے فریکچر کا شکار ہونے والے زخمی شان مسعود کی جگہ عبداللہ شفیق کو شامل کیا گیا ہے۔ اس کے علاوہ فاسٹ باؤلرز خرم شہزاد اور محمد عباس کی جگہ اویس ظفر اور نسیم شاہ کے چھوٹے بھائی عبید شاہ کو ٹیم میں شامل کیا گیا ہے، جبکہ آف اسپنر ساجد خان عامر جمال کی جگہ فائنل الیون کا حصہ بنے ہیں۔ محمد عباس نے پہلے ٹیسٹ کی دوسری اننگز میں 5 وکٹیں حاصل کی تھیں، جس میں ویسٹ انڈیز نے 90 رنز سے کامیابی حاصل کی تھی۔
پاکستان کی اسکواد میں کپتان بابر اعظم، امام الحق، اذان اویس، عبداللہ شفیق، سلمان علی آغا، اویس ظفر، محمد رضوان، ساجد خان، علی عثمان، محمد علی اور عبید شاہ شامل ہیں۔ واضح رہے کہ ویسٹ انڈیز نے سال 2000ء کے بعد سے ہوم یا اِوے بنیادوں پر پاکستان کے خلاف کوئی ٹیسٹ سیریز نہیں جیتی ہے۔