قومی کرکٹ ٹیم کی مسلسل بیٹنگ ناکامیوں سے پریشان پاکستان کرکٹ بورڈ نے جنوبی افریقہ کے سابق کرکٹر مائیک اسمتھ کے ساتھ ایک معاہدہ طے کرلیا ہے، جو دورہ انگلینڈ سے بیٹنگ کوچ کے عہدے کی ذمہ داریاں سنبھالیں گے۔
لیول 4 بیٹنگ کوچ اسمتھ کے پاس ٹی 20 کرکٹ میں فرنچائز ٹیموں کے ساتھ کام کرنے کا وسیع تجربہ موجود ہے، خاص طور پر وہ پاکستان سپر لیگ میں مختلف فرنچائزز کے ساتھ منسلک رہ چکے ہیں۔ دوسری جانب پاکستان کے لیے حقیقی بیٹنگ مسائل گزشتہ دو سے تین سال سے بالخصوص ٹیسٹ اسکواڈ کے ساتھ رہے ہیں۔
پی سی بی کے ذرائع نے بتایا کہ بیٹنگ کوچ کے عہدے کے لیے پی سی بی کے اشتہار پر درخواست دینے والے امیدواروں کو شارٹ لسٹ کرنے کے بعد اسمتھ کے ساتھ زبانی معاہدہ طے پا گیا تھا۔
توقع ہے کہ اسمتھ کو رواں ماہ کے آخر میں انگلینڈ میں پاکستان ٹیم کو جوائن کرنے کا گرین سگنل دے دیا جائے گا، جہاں 19 اگست سے تین ٹیسٹ میچز کی سیریز مقرر ہے۔
مائیک اسمتھ قومی سلیکٹر اسد شفیق کی جگہ لیں گے، جو عبوری بیٹنگ کوچ کے طور پر کام کررہے ہیں اور اس وقت قومی ٹیم کے ساتھ ویسٹ انڈیز میں موجود ہیں۔ سابق پاکستانی بیٹر اسد شفیق اپریل 2026 سے ٹیم کے عبوری بیٹنگ کوچ کے طور پر خدمات انجام دے رہے ہیں۔