کینیڈا میں مقیم پاکستانی ایتھلیٹ فوزیہ ہیمانی نے ایک اور بڑی کامیابی اپنے نام کرتے ہوئے چوتھی مرتبہ فل آئرن مین ٹرائیتھلون چیلنج کامیابی سے مکمل کر لیا۔
اوٹاوا میں ہونے والے آئرن مین مقابلے میں فوزیہ ہیمانی نے شاندار فٹنس اور بھرپور استقامت کا مظاہرہ کرتے ہوئے یہ دشوار چیلنج 15 گھنٹے، 22 منٹ اور 35 سیکنڈز میں مکمل کیا۔ انہوں نے 3.8 کلومیٹر سوئمنگ 1 گھنٹہ 45 منٹ، 180 کلومیٹر سائیکلنگ 7 گھنٹے 7 منٹ اور 42.2 کلومیٹر میراتھون 6 گھنٹے 11 منٹ میں مکمل کی۔
آئرن مین کو دنیا کے مشکل ترین انڈیورنس اسپورٹس مقابلوں میں شمار کیا جاتا ہے۔ فوزیہ ہیمانی اس سے قبل 2021، 2024 اور 2025 میں بھی فل آئرن مین چیلنج مکمل کر چکی ہیں، جبکہ وہ پانچ مرتبہ ہاف آئرن مین چیلنج بھی کامیابی سے مکمل کر چکی ہیں، جس سے انہوں نے ایک بار پھر پاکستان کا نام روشن کیا۔