یومِ استحصالِ کشمیر کے موقع پر اسپورٹس ڈیپارٹمنٹ لاہور ڈویژن کے زیرِ اہتمام ایک عظیم الشان ریلی کا انعقاد کیا گیا، جس کی قیادت ڈویژن اسپورٹس آفیسر لاہور طارق خانزادہ نے کی۔ ریلی اے پی ایس ماڈل ٹاؤن سے شروع ہو کر ہاکی گراؤنڈ پر اختتام پذیر ہوئی۔
اس موقع پر اسپورٹس ڈیپارٹمنٹ کے افسران، ملازمین اور ڈی ایس او قصور اظہر محمود سمیت لوگوں کی بڑی تعداد نے شرکت کی اور کشمیری عوام کے ساتھ مکمل یکجہتی کا اظہار کرتے ہوئے یومِ استحصالِ کشمیر کی اہمیت کو اجاگر کیا۔
ڈی جی اسپورٹس پنجاب محمد طارق قریشی اور ڈویژن اسپورٹس آفیسر طارق خانزادہ سمیت دیگر مقررین نے خطاب کرتے ہوئے کہا کہ بھارت کشمیر پر غیر قانونی طور پر قابض ہے اور وہاں کے عوام پر مظالم کی انتہا کی جا رہی ہے۔ انہوں نے اس عزم کا اعادہ کیا کہ کشمیر پاکستان کی شہ رگ اور اس کا لاینفک حصہ ہے، اور کشمیری عوام کے حقِ خودارادیت کی حمایت ہر سطح پر جاری رکھی جائے گی۔
ریلی کے اختتام پر مقبوضہ کشمیر کی آزادی اور شہدائے کشمیر کے درجات کی بلندی کے لیے خصوصی دعا کی گئی۔