پاکستان کرکٹ بورڈ نے ڈومیسٹک کرکٹر حمزہ نذر پر ویزا درخواست میں غلط اور نامکمل معلومات فراہم کرنے کے الزام میں دو سال کی پابندی عائد کر دی ہے۔ پی سی بی نے کرکٹر پر 10 لاکھ روپے جرمانہ بھی عائد کیا ہے۔
پی سی بی کے مطابق حمزہ نذر آئندہ دو سال تک کسی بھی ڈومیسٹک یا انٹرنیشنل کرکٹ میں حصہ نہیں لے سکیں گے۔ بورڈ کا کہنا ہے کہ معاملے کی تحقیقات کے لیے تین رکنی انکوائری کمیٹی تشکیل دی گئی تھی، جس نے کرکٹر کو اپنا مؤقف پیش کرنے کا مکمل موقع دیا۔
پی سی بی نے بتایا کہ کمیٹی نے شواہد اور حقائق کا جائزہ لینے کے بعد سفارشات پیش کیں، جن کی روشنی میں دو سالہ پابندی اور جرمانے کی منظوری دی گئی۔
بورڈ نے واضح کیا کہ غلط بیانی، حقائق چھپانا اور غلط معلومات فراہم کرنا ناقابل قبول ہے اور پاکستان کرکٹ کی ساکھ کو نقصان پہنچانے کی اجازت نہیں دی جائے گی۔