پاکستان کے ٹیسٹ اسکواڈ نے انگلینڈ کے دورے کے دوران ملک کا 79واں یومِ آزادی خصوصی تقریب کے ساتھ منایا۔
14 اگست کی مناسبت سے بیکن ہیم میں قائم ٹیم کی بیس پر مختصر تقریب کا انعقاد کیا گیا، جس میں کھلاڑیوں کو قومی فخر اور وطن سے محبت کے پیغامات دیے گئے۔
سبز رنگ کی ٹریننگ کٹس میں ملبوس قومی کرکٹرز ایک ہال میں جمع ہوئے، جہاں ایک سینئر عہدیدار نے اسکواڈ سے خطاب کیا۔ تقریب کے مرکز میں یومِ آزادی کے حوالے سے کیک بھی رکھا گیا۔
قومی ٹیم کے کھلاڑیوں نے کینٹ کے میدان کے باہر انفرادی ویڈیو پیغامات بھی ریکارڈ کرائے، جن میں قوم کو یومِ آزادی کی مبارکباد اور پاکستان کے لیے نیک خواہشات کا اظہار کیا گیا۔
کپتان بابر اعظم سمیت اسکواڈ کے سینئر کھلاڑیوں نے کیمرے کے سامنے اپنے پیغامات دیے، جنہیں بعد ازاں پاکستان کرکٹ بورڈ نے شیئر کیا۔
دوسری جانب قومی ٹیم پروفیشنل کاؤنٹی کلب (پی سی سی) سلیکٹ الیون کے خلاف تین روزہ وارم اپ میچ میں مصروف ہے۔ پہلے روز پی سی سی سلیکٹ الیون کی پوری ٹیم 305 رنز بنا کر آؤٹ ہوگئی۔
جواب میں پاکستان نے دن کے اختتام تک بغیر کسی نقصان کے 44 رنز بنائے۔ امام الحق 26 جبکہ اذان اویس 15 رنز پر ناٹ آؤٹ رہے۔دوسرے روز کے کھیل کے آغاز پر پاکستان کو میزبان ٹیم کی پہلی اننگز کی برتری ختم کرنے کے لیے مزید 261 رنز درکار تھے۔