آج آیت کے لئے آواز اٹھا رہے ہیں کل کوئی نیا ہیش ٹیک بن جائے گا، مریم نفیس رو پڑیں

آج کا ہیش ٹیگ آیت نور ہے، جسے اجتماعی زیادتی کا نشانہ بنانے کے بعد قتل کیا گیا اور لاش کنویں میں پھینک دی گئی۔ کل کا ہیش ٹیگ وہ نومولود بچہ تھا جسے بوری میں زندہ پایا گیا۔ اس سے پہلے 45 سالہ حنا تھی، جسے اپنے ہی گھر میں اپنے شوہر نے قتل کردیا۔ اس سے پہلے 20 سالہ معذور لڑکی تھی، جس کے ساتھ تھانے میں پولیس اہلکاروں نے زیادتی کی۔ اس سے پہلے ہیش ٹیگ 18 ماہ کی عائزَل تھی۔ کیا کوئی کچھ کر رہا ہے؟ نہیں!

خواتین اور بچوں کے خلاف بڑھتے ہوئے جنسی تشدد اور قتل کے واقعات پر اداکارہ مریم نفیس بھی شدید غم و غصے میں آبدیدہ ہوگئیں۔ انہوں نے ایک جذباتی ویڈیو کے ذریعے معاشرے اور حکام سے سوال کیا کہ آخر ایسے لرزہ خیز واقعات کب تک صرف سوشل میڈیا کے ہیش ٹیگز تک محدود رہیں گے؟

مریم نفیس نے حالیہ واقعے کا حوالہ دیتے ہوئے کہا کہ آج لوگ پانچ سالہ آیت نور کے لیے آواز اٹھا رہے ہیں، کل کسی اور معصوم بچے یا عورت کا نام ہیش ٹیگ بن جائے گا، لیکن اصل سوال یہ ہے کہ ان واقعات کو روکنے کے لیے عملی طور پر کیا کیا جا رہا ہے۔

واضح رہے کہ ہری پور سے تقریباً 15 روز قبل لاپتہ ہونے والی پانچ سالہ آیت نور کی لاش یونیورسٹی روڈ پر واقع ایک گودام کے کنویں سے برآمد ہوئی تھی۔ پولیس کے مطابق بچی کے اغوا کے شبہے میں متعدد افراد کو حراست میں لیا گیا جن میں سے تین ملزمان گرفتار ہوئے۔ پولیس کے مطابق ملزمان نے مبینہ طور پر بچی کو جنسی زیادتی کا نشانہ بنانے اور بعد ازاں لاش ٹھکانے لگانے کا اعتراف کیا ہے۔