بھارتی ریاست تامل ناڈو میں معروف یوٹیوبر مدھومیتا کے گھر سے تقریباً ایک کروڑ روپے مالیت کے سونے، ہیرے کے زیورات اور نقدی چوری ہوگئی۔
میڈیا رپورٹس کے مطابق واردات کنیاکماری کے علاقے ناگرکوئل میں ہوئی۔ چور گھر کے پچھلے دروازے کو کاٹ کر اندر داخل ہوئے اور 81 تولہ سونا سمیت لاکھوں روپے لے کر فرار ہوگئے۔
ابتدائی تحقیقات کے مطابق ملزمان نے مدھومیتا کی سوشل میڈیا سرگرمیوں سے گھر کے بارے میں معلومات حاصل کیں۔ رپورٹس کے مطابق یوٹیوبر اور ان کے شوہر زیورات اور نقدی کے ساتھ ویڈیوز بھی سوشل میڈیا پر شیئر کرتے تھے۔
واردات کے وقت مدھومیتا اہل خانہ کے ہمراہ خریداری کے لیے گھر سے باہر تھیں۔