پاکستانی اداکارہ صبور علی کی جانب سے اپنی ڈیڑھ سالہ بیٹی سرینا علی کو پری اسکول میں داخل کروانے کے فیصلے پر سوشل میڈیا صارفین نے مختلف آرا کا اظہار کیا ہے جہاں بعض لوگوں نے اتنی کم عمر میں بچے کو اسکول بھیجنے پر سوال اٹھایا۔
صبور علی نے حال ہی میں پروگرام "ہنسنا منع ہے" میں اپنی بیٹی کے پری اسکول جانے کے بارے میں بات کرتے ہوئے اس فیصلے کی وجہ بھی بتائی۔
اداکارہ کے مطابق اسکول کے پہلے دن ان کی بیٹی کافی روئی تھی جس کی وجہ سے انہیں کچھ پریشانی کا سامنا کرنا پڑا تاہم اب سرینا نئے ماحول سے مانوس ہوگئی ہیں اور خوشی سے اسکول جاتی ہیں۔
صبور علی نے بتایا کہ کم عمری میں پری اسکول میں داخلہ دلوانے کا بنیادی مقصد بیٹی کو دوسرے بچوں کے ساتھ گھلنے ملنے اور سماجی مہارتیں سیکھنے کا موقع فراہم کرنا ہے۔
اداکارہ کی وضاحت کے باوجود سوشل میڈیا پر اس فیصلے پر بحث جاری ہے۔ بعض صارفین کا خیال ہے کہ ڈیڑھ سال کی عمر باقاعدہ پری اسکول کے لیے بہت کم ہے جبکہ صبور علی اسے اپنی بیٹی کی سماجی تربیت کا حصہ قرار دے رہی ہیں۔
صبور علی نے اداکار علی انصاری سے شادی کی ہے اور دونوں کی ایک بیٹی سرینا علی ہیں۔