آسٹریا سے تعلق رکھنے والے ماؤنٹین بائیک رائیڈر ماریو نیوراؤٹر نے بلندی سے سائیکل پر چھلانگ لگا کر نیچے رکھے چھوٹے سے سرخ ڈبے کو پچھلے ٹائر سے کچل دیا اور گینیز ورلڈ ریکارڈ اپنے نام کرلیا۔
رپورٹس کے مطابق ماریو نیوراؤٹر نے ستمبر 2025 میں بائیک ری پبلک سولڈن فیسٹیول کے دوران 12.46 فٹ بلند پلیٹ فارم سے سائیکل پر چھلانگ لگائی اور حیران کن مہارت کا مظاہرہ کرتے ہوئے عین نشانے پر پچھلا ٹائر رکھ کر ڈبے کو کچل دیا۔
اس منفرد کارنامے پر ان کا نام سائیکل کے ذریعے کسی ہدف پر بلند ترین عمودی ڈراپ کے مردوں کے عالمی ریکارڈ میں درج کیا گیا۔
گینیز ورلڈ ریکارڈز سے گفتگو کرتے ہوئے ماریو نیوراؤٹر نے بتایا کہ اسٹنٹ کے دوران انہیں خوف محسوس نہیں ہو رہا تھا، تاہم وہ جانتے تھے کہ چھوٹے سے ڈبے کو درست نشانہ بنانا آسان نہیں ہوگا۔
انہوں نے مزید بتایا کہ اس مخصوص اسٹنٹ کی باقاعدہ مشق نہیں کی تھی، اس لیے انہیں اندازہ نہیں تھا کہ کامیابی کے لیے کتنی کوششیں درکار ہوں گی۔