پاکستان ریلوے نے ملتان میں رحمان بابا ایکسپریس کو پیش آنے والے حادثے کی ابتدائی تحقیقاتی رپورٹ جاری کردی، جس کے مطابق حادثہ مکینیکل خرابی کے باعث پیش آیا۔
رپورٹ کے مطابق ٹرین کی لگیج کوچ کا سائیڈ ہینگر ٹوٹ کر ٹرن آؤٹ کراسنگ میں پھنس گیا تھا۔ جائے حادثہ سے ٹوٹا ہوا ہینگر بھی برآمد کرلیا گیا ہے۔
واضح رہے کہ گزشتہ روز شیر شاہ پل کے قریب کراچی سے پشاور جانے والی رحمان بابا ایکسپریس کی تمام 15 بوگیاں پٹری سے اتر گئی تھیں۔ حادثے میں ایک بچی سمیت 7 افراد جاں بحق جبکہ 40 زخمی ہوگئے تھے۔
ایک مسافر کے مطابق حادثہ صبح سوا 5 بجے پیش آیا جبکہ روہڑی کے قریب ٹرین کی نویں بوگی کے نٹ بولٹ بھی درست کیے گئے تھے۔