جنگلی ریچھ کو دیکھ کر عام طور پر لوگ خوفزدہ ہوجاتے ہیں لیکن یورپی ملک بوسنیا و ہرزیگووینا میں ایک شخص نے اسی طاقتور جانور کو اپنا قریبی دوست بنا رکھا ہے۔ پیٹر ٹیوبک نامی شخص اور ان کی مادہ ریچھ ماسا کی دوستی کئی برسوں سے لوگوں کی توجہ حاصل کر رہی ہے۔
اس غیر معمولی رشتے کی ابتدا 2019 میں ہوئی جب پیٹر کو جنگل میں ریچھ کا ایک ننھا بچہ تنہا ملا۔ اس وقت ماسا کا وزن صرف دو کلوگرام تھا اور اس کے لیے اکیلے زندہ رہنا مشکل تھا۔ پیٹر اسے اپنے گھر لے آئے اور دودھ، پھلوں اور مناسب دیکھ بھال کے ذریعے اس کی پرورش شروع کردی۔
دلچسپ بات یہ ہے کہ پیٹر کو اس سے پہلے جانور پالنے کا کوئی تجربہ نہیں تھا، مگر ماسا کی آمد نے ان کی زندگی بدل دی۔ وقت گزرنے کے ساتھ ننھی ریچھ بڑی ہوتی گئی اور دونوں کے درمیان ایک مضبوط تعلق قائم ہوگیا۔
آج ماسا کا وزن تقریباً 150 کلوگرام ہوچکا ہے لیکن اس کی ایک پرانی عادت اب بھی نہیں بدلی۔ وہ بچپن کی طرح پیٹر کی گود میں بیٹھنے کی کوشش کرتی ہے حالانکہ اب اس کا بھاری جسم سنبھالنا آسان نہیں رہا۔
پیٹر کے مطابق ریچھ کے ساتھ رہنا بظاہر دلچسپ ضرور ہے، لیکن اس میں بہت احتیاط اور ذمہ داری کی ضرورت ہوتی ہے۔ کھیل کود کے دوران انہیں کبھی خراشیں آجاتی ہیں تو کبھی ان کے کپڑے پھٹ جاتے ہیں۔
ماسا کے بعد پیٹر نے لیوبیتسا نامی ایک اور مادہ ریچھ کو بھی اپنی دیکھ بھال میں لے لیا۔ دونوں ریچھ ان کے گھر کے احاطے میں رہتی ہیں، جبکہ وہاں دو بھیڑیوں، ہرن، ریکون اور دیگر جانوروں کی بھی دیکھ بھال کی جاتی ہے۔
بوسنیا کے پہاڑی علاقے ماؤنٹ اوزرین میں واقع پیٹر کا گھر اب جانوروں سے محبت رکھنے والے سیاحوں کی دلچسپی کا مرکز بن چکا ہے۔ مختلف مقامات سے لوگ ان ریچھوں کو دیکھنے کے لیے وہاں پہنچتے ہیں۔
پیشے کے اعتبار سے پیٹر الیکٹریشن ہیں اور اپنی اہلیہ میلسیا اور نو سالہ بیٹی ایوا کے ساتھ رہتے ہیں۔ انہیں پیراگلائیڈنگ، پہاڑوں پر پیدل سفر اور غاروں کی سیر کا بھی شوق ہے، تاہم ان کے خاندان کی روزمرہ زندگی میں جانوروں کو خاص اہمیت حاصل ہے۔
پیٹر نے بتایا کہ وہ دونوں ریچھوں کو قدرتی ماحول میں واپس چھوڑنے کے امکان پر بھی غور کر رہے ہیں، لیکن انہیں خدشہ ہے کہ انسانوں کے ساتھ طویل عرصہ گزارنے کی وجہ سے یہ جانور جنگل میں خود کو محفوظ نہیں رکھ سکیں گے۔
فی الحال ماسا اور لیوبیتسا ان کی نگرانی میں ہی رہیں گی۔ پیٹر اور ماسا کی یہ کہانی انسان اور جنگلی جانور کے درمیان قائم ہونے والے ایک غیر معمولی تعلق کو ظاہر کرتی ہے، تاہم ماہرین کے نزدیک ریچھ طاقتور اور غیر متوقع رویے والے جانور ہیں، اس لیے ان کے قریب رہنا عام لوگوں کے لیے خطرناک ہوسکتا ہے۔