چین کے ایک نوجوان وی لاگر نے فلمی دنیا کے مشہور ولن گرین گوبلن کے ہوور بورڈ جیسا برقی بورڈ تیار کرلیا جس پر سوار ہوکر اس نے دریائے یانگسی کے اوپر تقریباً 300 میٹر کا فضائی سفر مکمل کیا۔
تفصیلات کے مطابق سونگ شنگ یو نے اس منفرد ایجاد کے لیے پہلے جیٹ انجن استعمال کرنے کی کوشش کی تاہم آگ لگنے کے باعث اس کا ابتدائی تجربہ ناکام ہوگیا۔ نوجوان نے ہمت نہ ہاری اور دس برقی موٹرز کی مدد سے نیا ماڈل تیار کرلیا۔
اس نے دو موبائل فونز پر چلنے والے مصنوعی ذہانت (اے آئی) کے نظام کی مدد سے بورڈ کا توازن برقرار رکھنے کی مشق کی اور تقریباً دو منٹ میں 300 میٹر کا سفر طے کیا۔
نوجوان کی اس ایجاد کی ویڈیو سوشل میڈیا پر تیزی سے مقبول ہورہی ہے۔ تاہم اس نے لوگوں کو خبردار کیا ہے کہ مناسب حفاظتی انتظامات اور مہارت کے بغیر اس طرح کا تجربہ کرنے کی کوشش نہ کریں۔