پیرو کے ایئرپورٹ پر کسٹمز حکام نے گندے موزوں میں چھپائی گئی 3 ہزار سے زائد زندہ ٹارنٹولا مکڑیاں برآمد کرلیں۔
غیر ملکی خبر رساں ادارے اے ایف پی کے مطابق لیما کے جارج شاویز انٹرنیشنل ایئرپورٹ پر دو جرمن اور ایک پولش شہری کے تین سوٹ کیسوں سے مکڑیاں پکڑی گئیں، جنہیں جرمنی اسمگل کیا جا رہا تھا۔
حکام کے مطابق معمول کی تلاشی کے دوران سامان میں غیرمعمولی حرکت محسوس ہونے پر سوٹ کیس کھولے گئے تو موزوں کے اندر چھوٹی بڑی ہزاروں مکڑیاں موجود تھیں، جن میں انڈے، نومولود اور بالغ مکڑیاں بھی شامل تھیں۔
ایک ٹارنٹولا کی یورپی مارکیٹ میں قیمت تقریباً 500 یورو بتائی جاتی ہے، جس کے حساب سے ضبط شدہ مکڑیوں کی ممکنہ مالیت 15 لاکھ یورو بنتی ہے۔ پولیس نے تینوں مشتبہ افراد کو حراست میں لے کر جنگلی حیات کی غیرقانونی اسمگلنگ کے الزام میں کارروائی شروع کردی ہے۔