سری لنکا کرکٹ ٹیم کے کپتان کوشل مینڈس نے راولپنڈی میں پریس کانفرنس کرتے ہوئے کہا ہے کہ پاکستان میں ایک ماہ سے زائد عرصہ ہوگیا کرکٹ کھیلتے ہوئے اور یہاں سیکیورٹی بہترین ہے، جبکہ سری لنکا اور پاکستان کا کھانا بھی تقریباً ایک جیسا ہے۔
انہوں نے مزید کہا کہ ٹیسٹ کرکٹ وائٹ بال فارمیٹس سے مختلف ہے اور ہر کھلاڑی ٹیسٹ کرکٹ کھیلنا چاہتا ہے، سری لنکا کی بولنگ اور بیٹنگ میں توازن ہے اور ہمارے بولرز کے پاس فرسٹ کلاس کرکٹ کا وسیع تجربہ ہے۔
اس موقع پر پاکستان ٹیسٹ ٹیم کے کپتان بابر اعظم نے پریس کانفرنس کرتے ہوئے کہا کہ ہمارے کھلاڑی فرسٹ کلاس کھیل کر آرہے ہیں اور فارم میں ہیں، میری سوچ ہمیشہ مثبت رہتی ہے اور بطور سینئر ہمیشہ بہترین پرفارمنس دینے کی کوشش کرتا ہوں۔
انہوں نے کہا کہ کوئی بھی پرفیکٹ نہیں ہوتا، بہتری کی گنجائش ہمیشہ ہوتی ہے، میں اپنی غلطیوں کے بارے میں سوچتا ہوں اور جتنا کھیلوں گا اتنا بہتری کی طرف جاؤں گا۔ واضح رہے کہ پاکستان اور سری لنکا کے درمیان سیریز کا پہلا ٹیسٹ میچ کل سے راولپنڈی میں شروع ہوگا۔