وفاقی وزیر دفاع خواجہ محمد آصف نے پاکستان تحریک انصاف (پی ٹی آئی) کی قیادت کے مابین پائے جانے والے مبینہ اختلافات پر سخت ردعمل کا اظہار کرتے ہوئے کہا ہے کہ جو جماعت خود اندرونی خلفشار اور باہمی چپقلش کا شکار ہو، وہ اپنے بانی چیئرمین کی رہائی کے لیے کیا مؤثر کردار ادا کر سکتی ہے۔
پی ٹی آئی کے رہنماؤں لطیف کھوسہ اور سلمان اکرم راجہ کی جانب سے ایک دوسرے کے خلاف دیے گئے بیانات پر تبصرہ کرتے ہوئے وزیر دفاع کا کہنا تھا کہ پارٹی رہنماؤں کی آپسی لڑائی سے ظاہر ہوتا ہے کہ وہ بانی پی ٹی آئی کو جیل میں ہی رکھنا چاہتے ہیں تاکہ ان کی اپنی سیاسی حیثیت برقرار رہے۔ انہوں نے مزید کہا کہ ایسے ساتھیوں اور رہنماؤں کا طرزِ عمل بانی پی ٹی آئی کے لیے قید کی صعوبتوں سے بھی زیادہ تکلیف دہ ہے۔
خواجہ آصف نے بانی پی ٹی آئی کی جانب سے طبی بنیادوں پر عدالت سے ریلیف مانگنے کے اقدام کو بھی تنقید کا نشانہ بنایا۔ انہوں نے اپنے بیان میں کہا کہ ماضی میں جو شخص اپنے سیاسی مخالفین کی اسیری کے دوران ان کی بیماریوں کا تمسخر اڑایا کرتا تھا، آج وہ خود اسی صورتحال سے دوچار ہے اور یہ سب مکافاتِ عمل کا نتیجہ ہے۔
وزیر دفاع نے مزید کہا کہ دوسروں کی تکالیف پر خوش ہونے والوں کو قدرت کے نظام کو فراموش نہیں کرنا چاہیے۔ واضح رہے کہ گزشتہ روز بانی پی ٹی آئی کے وکیل سلمان صفدر نے اپنے مؤکل کی ہدایات پر اعلیٰ عدلیہ سے طبی بنیادوں پر ریلیف فراہم کرنے کی استدعا کی تھی۔