پنجاب میں آئندہ دو روز اسموگ کی شدت بڑھنے کا امکان، این ڈی ایم اے کا الرٹ جاری

image

پنجاب کے مختلف اضلاع میں آئندہ دو روز کے دوران اسموگ کی شدت میں اضافے کا امکان ظاہر کیا گیا ہے، جس کے پیش نظر نیشنل ڈیزاسٹر مینجمنٹ اتھارٹی (این ڈی ایم اے) نے لاہور سمیت صوبے کے مختلف علاقوں کے لیے الرٹ جاری کردیا۔

این ڈی ایم اے کے مطابق لاہور، قصور، گوجرانوالہ، حافظ آباد، ننکانہ صاحب، سرگودھا، شیخوپورہ، سیالکوٹ، نارووال، اوکاڑہ اور فیصل آباد میں اسموگ کی شدت بڑھنے کا امکان ہے۔

الرٹ کے مطابق جھنگ، خانیوال، ملتان، خانپور، کوٹ ادو، بہاولپور اور پنجاب کے دیگر علاقوں میں بھی اسموگ اور دھند کی صورتحال پیدا ہوسکتی ہے، جس کے باعث حدِ نگاہ متاثر ہونے اور ٹریفک کی روانی میں مشکلات پیش آنے کا خدشہ ہے۔

این ڈی ایم اے نے خبردار کیا ہے کہ فضائی آلودگی کے باعث شہریوں کو سانس لینے میں دشواری، آنکھوں میں جلن اور دیگر سانس کی بیماریوں کا سامنا ہوسکتا ہے۔ بچوں، بزرگوں اور سانس کے امراض میں مبتلا افراد کو خصوصی احتیاط برتنے کی ہدایت کی گئی ہے۔

ترجمان این ڈی ایم اے کے مطابق شہری سفر کے دوران احتیاطی تدابیر اختیار کریں، ٹریفک ایڈوائزری پر عمل کریں اور اسموگ و دھند کی شدت کے دوران غیر ضروری سفر سے گریز کریں۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US