پاکستانی فلم انڈسٹری کے معروف مصنف ناصر ادیب نے سینئر اداکار فردوس جمال کی اہلیہ اور بچوں کی جانب سے انہیں تنہا چھوڑ دیے جانے پر گہرے رنج و غم کا اظہار کیا ہے۔ پنجابی اور اردو سینما کو کئی یادگار کہانیاں دینے والے اور سماجی موضوعات پر کھل کر بات کرنے والے ناصر ادیب نے حال ہی میں ایک یوٹیوب پوڈکاسٹ میں گفتگو کرتے ہوئے فردوس جمال کے گھریلو حالات اور اہل خانہ کے رویے پر مایوسی ظاہر کی۔
ان کا کہنا تھا کہ ہمارے معاشرے میں یہ عام روش بن چکی ہے کہ جب کوئی شوہر معاشی طور پر کمزور پڑ جائے یا کسی بری لت کا شکار ہو جائے تو اہلیہ اس سے کنارہ کشی اختیار کر لیتی ہے یا اسے گھر سے بے دخل کر دیتی ہے، جبکہ اس کے برعکس کوئی ماں اپنے بے روزگار یا بگڑے ہوئے بیٹے کو کبھی تنہا نہیں چھوڑتی بلکہ ہر حال میں اس کی دیکھ بھال کرتی ہے۔
ناصر ادیب نے خواتین پر زور دیا کہ وہ اس معاملے کی نزاکت کو سمجھیں اور مشکل وقت میں اپنے شریکِ حیات کا ساتھ نہ چھوڑیں۔ فردوس جمال کا ذکر کرتے ہوئے انہوں نے کہا کہ چند روز قبل یہ خبر پڑھ کر انہیں دلی صدمہ پہنچا کہ ان کی اہلیہ اور بچوں نے انہیں گھر سے نکال کر تنہا چھوڑ دیا ہے۔ ان کے مطابق جس شخص نے اپنی تمام عمر لگا کر اپنے خاندان کے لیے چھت بنائی، آج محض پیسے نہ ہونے اور کمائی رک جانے کی وجہ سے وہی شخص اپنے ہی گھر والوں کے لیے ناپسندیدہ بن گیا ہے، جو کہ انتہائی تکلیف دہ اور افسوسناک امر ہے۔