عوام کو فون کی خریداری پر 15 ہزار تک ڈسکاؤنٹ ملے گا، سگریٹ کی قیمتیں بھی نیچے آگئی ہیں اور گاڑیوں سمیت سیکڑوں چیزوں کی قیمتوں میں نمایاں کمی دیکھی جارہی ہے۔
پاکستان میں گزشتہ چند ماہ سے مہنگائی بے لگام ہوچکی ہے اورپاکستان میں ایک طرف 1964 کے بعد سب سے زیادہ مہنگائی دیکھی جارہی ہے وہیں اچانک ملک میں سیکڑوں چیزوں کی قیمتوں میں کمی کی اطلاعات بھی سامنے آرہی ہیں۔
حکومت کی جانب سے سیکڑوں اشیا پر عائد ریگولیٹری ڈیوٹی کی میعاد 31 مارچ 2023ء کو ختم ہوگئی تھی اور ٹیرف پالیسی بورڈ کے چیئرمین نے مزید توسیع سے انکار کر دیا تھا۔
لوگوں کیلئے فونز خریدنا ایک خواب بنتا جارہا تھا لیکن حکومت کی جانب سے امپورٹڈ موبائل فون پر ریگولیٹری ڈیوٹی ختم کئے جانے کے بعد موبائل فونز کی قیمتوں میں حیرت انگیز کمی دیکھی گئی ہے۔
ریگولیٹری ڈیوٹی ختم ہونے کے بعد موبائل فون تقریبا 25 فیصد سستے ہوں گےاور اب تیس ہزار والا موبائل تقریباً ساڑھے 22 ہزار کا ہوجائے گا۔
گاڑیوں کے شوقین افراد کیلئے بھی بتاتے چلیں کہ بیرون ممالک سے استعمال شدہ گاڑیاں منگوانے پر بھی 20 فیصد ڈیوٹی ختم کردی گئی ہے۔
پاکستان میں اب صرف گاڑیاں، فونز اور سگریٹ نہیں بلکہ ہوم اپلائنسز، گوشت، مچھلی، فروٹ، سبزیاں، جوتے، فرنیچر، آئسکریم، کتے بلیوں کی خوراک، میوزیکل انسٹرومنٹ سمیت دیگر سیکڑوں اشیا بھی سستی ملیں گی۔