پاکستان تحریک انصاف کے چیئرمین بیرسٹر گوہر خان نے کہا ہے کہ ہمارا حق ہمیں آخرکار مل گیا، یہ فیصلہ تاریخ میں یاد رکھا جائے گا، چیف الیکشن کمیشن سپریم کورٹ کے فیصلے پر عمل کرے۔
سپریم کورٹ کے باہر پی ٹی آئی رہنماؤں کے ہمراہ میڈیا سے گفتگو کرتے ہوئے انہوں نے کہا کہ سپریم کورٹ نے آئین میں ترامیم کا راستہ روک دیا۔ یہ دو تہائی اکثریت لے کر آئین میں ترامیم کرنے جارہے تھے، یہ چاہتے تھے ہماری سیٹیں ہم سے چھین لی جائیں گی۔
بیرسٹر گوہر کا کہنا تھا کہ پوری دنیا نے دیکھا کس طرح ملک میں جمہوریت کو پامال کیا گیا، سب نے دیکھا پی ٹی آئی کو کس طرح الیکشن سے باہر کیا گیا۔ آج 25 کروڑ عوام کے لیے اور محب وطن پاکستانیوں کے لیے خوشی کا دن ہے۔
سپریم کورٹ کا مخصوص نشستیں پی ٹی آئی کو دینے کا حکم
انہوں نے کہا کہ اس میں کوئی مضاحقہ نہیں کہ جسٹس منصور نے فیصلہ سنایا، عوام آج نوافل ادا کریں، اللہ کا شکرادا کریں۔ آج 11 ججز نے متفقہ طور پر کہا پی ٹی آئی ان سیٹیوں کی حقدار ہے، انشاءاللہ اب تمام سیٹیں پی ٹی آئی کو واپس ملیں گی۔
چیئرمین پی ٹی آئی نے مطالبہ کیا کہ آج سپریم کورٹ کے فل کورٹ نے پی ٹی آئی کے حق میں سچ کا ساتھ دیا، چیف الیکشن کمیشن فوری مستعفی ہوجائیں۔
اس موقع پر پی ٹی آئی رہنما رہنما کنول شوزب بولیں کہ پوری دنیا نے دیکھا کس طرح ملک میں جمہوریت کوپامال کیا گیا۔ سب نے دیکھا پی ٹی آئی کو کس طرح الیکشن سے باہر کیا گیا، ہمارے ساتھ نانصافی ہوئی تھی، عدالتیں انصاف کے نظریے کے ساتھ کھڑی ہیں۔
خیال رہے کہ آج سپریم کورٹ نے پی ٹی آئی کو مخصوص نشستوں کا حقدار قرار دے دیا ہے۔